Ekvador Futbol Federasiyasının (EFF) sabiq prezidenti Luis Çiriboqa FİFA-nın korrupsiya məsələsində günahkar sayılıb. Sportnet.az-ın məlumatına görə, futbol funksioneri 10 illik həbs cəzası alıb.
2015-ci ilin yanvarında bu posta 4-cü dəfə seçilən Çiriboqa təşkilatın pullarının "yuyulması"nda təqsirkar bilinib. Bu, 6,1 milyon dollar təşkil edib. O, vəzifəsindən sui-istifadə başçılıq etdiyi təşkilatının hesabına daxil olan qanunsuz maliyyə vəsaitlərini gizlədib.
Çiriboqa ötən ilin dekabrında həbs olunub. Onun vəkilləri məhkəmənin qərarından şikayət etmək fikrindədir.
Xatırladaq ki, 2015-ci ilin mayında FİFA-da yaranan böyük qalmaqal nəticəsində 14 futbol funksionerinə ittiham sürülüb.
