Milli çempionatda iz buraxan 8 əcnəbi mütəxəssis - LAYİHƏ

İlk olaraq "Bakı"da çalışan, sonradan əyalətə yollanan digər əcnəbi mütəxəssis Cüneyt Biçər olur. Gənc türkiyəli mütəxəssis "Bakı"da baş məşqçi əvəzi olsa da, qısa müddətdə uğur qazana bilib. O, işlədiyi 2009/10 mövsümündə həm Azərbaycan kubokuna, həm də milli çempionatın gümüş medalına yiyələnib. Bundan sonra "Xəzər Lənkəran"da uşaq futbolunda çalışan Biçər 2011/12 mövsümündə baş məşqçi təyin olunub. Lənkəran klubu həmin mövsüm də gümüş mükafatçı olub. Biçərin 2 klubda cəmi 15 oyun keçirib. Bunlardan 8-də qələbə, 4 heç-heçə, 3 məğlubiyyət olub (topların fərqi 21-8) və 28 xal qazanılıb.  

"Bank təmsilçiləri"nin mütləq rekordçusu

Kaxaber Tsxadadzenin hər 2 klubu paytaxtın, özü də "bank təmsilçisi" olub. Bunlar Bakının "Standard" və "İnter" klublarıdır. Gürcü mütəxəssis ilk komandasında cəmi 1 il işləyibsə, "bankirlər"də 6 mövsüm keçirib. Tsxadadzenin oyun sayına görə əcnəbilər arasında mütləq rekordçudur ki, bu, 221 matçdır. O, bunların demək olar yarısında - 110-də qələbəyə sevinib. 61 heç-heçə edən gürcü baş məşqçi 50 dəfə meydanı məğlub tərk edib (topların fərqi - 286-172). Tsxadadze 390 xal toplayıb ki, bu da rekord göstəricidir.  

 Yaxın klubların birindən digərinə keçən 

Kemal Alispahiç işinə əyalətdə başlayarq sonradan paytaxta yollanıb. Bu, əvvəlcə Salyanda "Muğan"da, sonra Bakıda "Rəvan" klubunda çalışmaq idi. Əslində, bu klubların bir-biri ilə yaxın, rəhbərliyin eyni olduğunu nəzərə alsaq, bosniyalı mütəxəssis demək olar eyni strukturda işləyib. Alispahiç bu klubların hər birində cəmi 1 mövsüm keçirib. Maraqlıdır ki, oyun sayları da bərabər olub - hərəyə 12. Bosniyalı mütəxəssisin "Muğan" və "Rəvan"da qələbələrinin sayının da eyni oması diqqət çəkir - hərəyə 3. O, 24 matçın 6-da qələbəni bayram edibsə, 3 dəfə heç-heçə edib, 15 məğlubiyyət alıb (topların fərqi 17-40) və 21 xal toplayıb.  

 1 klubda 3 dəfə işləyən 

Naci Şensoyla bağlı vəziyyət fərqlidir. Məsələ ondadır ki, türkiyəli mütəxəssis eyni kluba qayıdıb və 3 dəfə orda işləyib. Bu, Tovuzun "Turan" klubudur. Ölkəmizdə işləyən ilk əcnəbi mütəxəssis olan Şensoy ümumilikdə 4 mövsümdə iş başında olub. Düzdür, bunlardan yalnız 2004/05 mövsümü tam, ən yüksək göstərici - 4-cü yer də həmin vaxt olub. Şensoy "Turan"da 61 matç keçirib ki, bunlardan 34-də qalib gələ bilib. Qalan 27 oyundan 12-də bərabərlik, 15-də məğlubiyyət qeydə alınıb. Topların fərqi 89-44 tovuzluların xeyrinə olub. Şensoy "Turan"da 114 xal toplayıb.  

 Həm iki klubda işləyən, həm də geri qayıdan 

Azərbaycan milli çempionatında işləmiş daha bir türkiyəli mütəxəssis - Rasium Kara isə həm iki klubda işləyənə, həm də geri qayıdana aiddir. Onun iki klubu "Qarabağ"la "Xəzər Lənkəran" olub. Kara ölkəmizdə fəaliyyətə başladığı Lənkərana sonradan qayıdıb və Azərbaycan karyerası məhz orada bitib. 2008-ci ilin avqustunda, həmin mövsümün startına 1 həftə qalmış "Qarabağ"ı "Xəzər Lənkəran"a dəyişən elə keçmiş komandasına "Fırtınalar meydanı"da 1:3 hesablı məğlubiyət nəticəsində qovulub.  

Kara Azərbaycanda işlədiyi 5 mövsümdə çempionatda 82 matç keçirib. Bunlardan 43-də qələbə, 17 heç-heçə, 22 məğlubiyyət qeydə alınıb (topların fərqi 118-59). Kara 146 xal toplayıb. 

 Tsxadadzenin yerinə keçən həmyerlisi 

Tsxadadzenin həmyerlisi, Azərbaycanda onun köməkçisi işləmiş Badri Kvaratsxeliya da 2 klubda çalışsa da, bunlardan 1-i aşağı divizion təmsilçisi olub. Söhbət 2014/15 mövsümündə rəhbərlik etdiyi "Turan"dır. Çünki Tovuz klubu həmin vaxt artıq Premyer Liqada deyildi, birinci diviziona düşmüşdü. Kvaratsxeliya Tsxadadzenin 2009-cu ilin qışında "Standard"dan gedişindən sonra baş məşqçi postuna keçib və 9 oyunda iş başında olub. Bunların 3-də qələbə, 1-də heç-heçə, 8 məğlubiyyət və 12 xal olub (topların fərqi 8-12). 

Uğursuz Uzunca 

Nəhayət, sonda Azərbaycanda işləmiş daha bir türkiyəli mütəxəssis - İbrahim Ucunzadan bəhs edəcəyik. O, ölkəmizdə 2 klubda, 3 komandada işləyib. Düzdür, bunlar yaxın klublar olub. Onlardan 2011/12 mövsümündə işlədiyi "Lokomotiv" (Biləcəri) birinci divizion təmsilçisi idi. Ucunca 2013-15-ci illərdə isə "Bakı" klubunda işləyib. O, 2013/14 mövsümündə "zolaqlılar"ın əvəzedici komandasına başçılıq edib. "Bakı"nın Premyer Liqada son mövsümü olan 2014/15-də isə türkiyəli onun baş məşqçisi olub. Bu fəaliyyət 32 oyundan ibarət idi. Onların yalnız 3-də qalib gələn Uzunza 8 heç-heçə, 21 dəfə meydanı məğlub tərk edib (topların fərqi 19-68). "Bakı" onun rəhbərliyi altında cəmi 17 xal toplayıb və 2004-cü ildən fasiləsiz çıxış etdiyi güclülər dəstəsini tərk edib.  

Mehman SÜLEYMANOV

Yazı AFFA yanında Media Komitəsi tərəfindən maliyyələşdirilib