AZAL Azərbaycan Premyer Liqasında qələbə həsrətinə son qoyub. Sportnet.az-ın məlumatına görə, Tərlan Əhmədovun baş məşqçisi olduğu komanda buna çempionatda ilin son matçında nail olub. "Təyyarəçilər" "Neftçi" ilə "Dalğa Arena"da keçirilən səfər qarşılaşmasında 1:0 hesabı ilə üstün olub. Göründüyü kimi, Şüvəlan təmsilçisinin həsrəti qonşu məkanda - Mərdəkanda bitib.
Tərlan Əhmədovun yetirmələri cari mövsümdə 1 dəfə, elə bu ay meydanı qalib tərk etsə də, bu, ölkə kubokunda idi. Birinci divizon təmsilçisi "Rəvan" üzərində evdə qələbə böyükhesablı olub - 4:0 Həmin oyunda 5 dəqiqəyə (80 və 85-ci) dubl edən gürcü hücumçu David Canelidze bu dəfə çempionatda qələbə topunun müəllifi olub. Özü də yenə 80-ci dəqiqədə fərqlənib.
"Təyyarəçilər" bunadək Premyer Liqada sonuncu qələbəsini ötən mövsümün XXXII turunda "Xəzər Lənkəran" üzərində Şüvəlanda qazanıb. Maraqlıdır ki, onda da hesab 1:0 olub və onda da gürcü legionerin ikinci hissədə vurduğu yeganə qol qələbə gətirib. Fərq ondadır ki, keçən dəfə Nuqar Kvirtiya fərqlənib. AZAL 231 gündən sonra çempionatda qələbəni bayram edib.
