Futbol üzrə Azərbaycan Kubokunda daha bir yarımfinalçı müəyyənləşib. Sportnet.az-ın məlumatına görə, "Qarabağ" klubu növbəti mərhələyə yüksəlib.
"Sumqayıt"a ilk oyunda 6:0 hesabı ilə qalib gələn Qurban Qurbanovun rəhbərlik etdiyi komanda cavab görüşündə 5:2 hesablı qələbəyə sevinib. İki oyunun nəticəsinə əsasən "Qarabağ" adını yarımfinala yazdırıb.
Qalib komandadan Namiq Ələsgərov 8, 16 və 82-ci dəqiqələrdə vurduğu qollarla "het-trik" edib. Bundan başqa Vüqar Nadirov 70-ci, Rahid Əmirquliyev isə 89-cu dəqiqədə fərqlənib. Meydan sahiblərindən isə hər iki qolu 14 və 80-ci dəqiqələrdə Amil Yunanov vurub.
"Qarabağ"ın yarımfinaldakı rəqibi "Zirə" - "Neftçi" cütünün qalibi olacaq.
