Cənubi Afrika Respublika (CAR) milli komandasının baş məşqçisi Efraim Maşaba istefaya göndərilib. Sportnetaz-ın məlumatına görə, bu ölkənin futbol federasiyasının rəsmi saytı 66 yaşlı mütəxəssislə yollarını birdəfəlik ayırdığını açıqlayıb.
Bunadək vəzifəsindən bir müddət kənarlaşdırılan Maşabanın postuna qaytarılmamağı daha məqsədəuyğun sayılıb. Səbəb mütəxəssisin 2018-ci il dünya çempiomnatının seçmə mərhələsində Seneqal yığmasına 2:1 hesabı ilə qalib gəldikləri matçdan sonra federasiya rəhbərliyi ilə münaqişəyə girməsidir.
Qurum Afrika futbolu ilə tanış olan mütəxəssisi axtardığını bəyan edib. Yeni baş məşqçinin qarşısına qoyulan məqsəd yığmanı Rusiyada keçiriləcək dünya çempionatına çıxarmadqır. CAR yığması cari seçmə mərhələdə 2 oyundan 4 xalla qrupunda 2-ci yerdə gedir.
Qeyd edək ki, "Qarabağ"ın cənubi afrikalı hücumçusu Dino Ndlovu məhz Maşabaya görə yığmada oynamaqdan imtina etdiyini mətbuata açıqlayıb.
