Sumqayıt şəhəri 21 saylı məktəbin futbol meydançasında tikinti işləri aparılır. Sportnet.az-ın məlumatına görə, sakinlər ərazidə qeyri-qanuni tikintinin aparıldığını iddia edirək etiraz edirlər. Şikayətçilər meydançanın sahəsində çoxmərtəbəli yaşayış binasınin tikilmək planının olduğunu deyirlər.
Şəhər sakini Vüqar Xəlilovun sözlərinə görə, 12-ci mikrorayonda yerləşən 21 nömrəli məktəbin meydançasında uşaqlar futbol oynayırdı: "Bir müddətdir ki, həmin ərazi hasarlanıb, bəzi ərazilərdə tikilinin təməli atılıb, kənarlarda isə texnikalar işləyir. Biz sakinlərin dəfələrlə etdiyi narazılıqlardan sonra tikinti işləri dayandırılıb. Amma ərazidə hasarlama işlər davam edir. Bizim şikayətimiz əsasında müvafiq qurumların əməkdaşları əraziyə gəldilər. Amma problem həll olunmadı. Biz sakinlər vəziyyətdən çox narahatıq”.
Sakin həmçinin iddia edir ki, tikinti aparan şəxslər onları aldadır ki, bura əlillər üçün bina tikilir: "Tikinti aparan şəxsləri tanımırıq. Bizə yalandan deyirlər ki, şəhid ailələri və əlillər üçün bina tikilir. Amma buna inanmırıq. Tikintinin dərhal dayandırılmasın tələb edirik.”
Sumqayıt Şəhər İcra Hakimiyyətindən bu məsələnin onlara yox, Sumqayıt şəhər Memarlıq və Şəhərsalma İdarəsinə aid olduğunu bildiriblər. Adı çəkilən idarə ilə əlaqə yaratmaq isə mümkün olmayıb (Femida.az).
