"Qarabağ"ın futbolçusu Ansi Aqolli kapitanı olduğu Albaniya milli komandasından baş məşqçi Canni De Byazinin ayrılmasına reaksiya verib. Sportnet.az-ın məlumatına görə, təcrübəli müdafiəçi italiyalı mütəxəssisə yığmadakı 5 illik fəaliyyəti dövründə verdiyi töhfələri qarşılığında minnətdarlığını bildirib.
O, sosial şəbəkədə yazıb: "6 il ərzində bizə çox şey öyrətdiniz, inanılmaz nəticələrə nail olmağın mümkünlüyünü göstərdiniz, özümüzə daha çox inanmağa məcbur etdiniz. Albaniya futbolu tarixini birgə yaza bildik. Sizin adınız isə böyük hərflərlə yazıldı".
Aqolli bildirib ki, De Byazi gözəl oyunla böyük nəticələr qazanaraq, komandanı daha yüksək səviyyəyə çatdırıb: "Bütün bunlara əsasən, əminəm ki, albaniyalılar həmişə Sizi görməyə şad olacaqlar. Siz bizlərdən birisiniz. Görüşənədək!"
Qeyd edək ki, Canni De Byazi ötən gün Albaniya millisinin baş məşqçi postundan istefa verdiyini açıqlayıb. Onun fəaliyyəti dövründə Ansi Aqollinin komandası 2016-cı il Avropa çempionatına vəsiqə qazanıb və qrup 3-cüsü olub. 2018-ci il dünya çempionatının seçmə mərhələsində Albaniya millisi 6 turdan sonra 9 xalla 3-cü pillədə qərarlaşıb. De Byazinin rəhbərlik etdiyi kollektiv şərikli liderlər İspaniya və İtaliyadan 7 xal geri qalır.
