Ötən mövsümü AZAL-da keçirən Tural Hümbətov karyerasını ölkə xaricində davam etdirməyə çox yaxındır.
Sportnet.az-a bu barədə futbolçu özü məlumat verib. Hazırda Makedoniyada olan Hümbətov "Pobeda" klubunun düşərgəsindədir. U-21 yığma komandamızın da formasını geyinmiş stoper Makedoniya klubunun məşqçilər korpusunun etimadını qazanmağa çalışır. Hümbətov "Pobeda"ya mümkün keçidini şərh edib: "Başqa klublara keçmək ehtimalım da var. Amma "Pobeda"dan gələn təklif daha cəlbedici oldu. Üstəlik bu klub yüksək liqada çıxış edir. Hazırda baxışdayam və özümü ən yaxşı şəkildə göstərməyə çalışıram. Yaxın vaxtlarda mənə dəqiq cavablarını deyəcəklər. İnanıram ki, mənimlə müqavilə imzalamaq istəyəcəklər".
Qeyd edək ki, "Pobeda" Makedoniyanın titullu klublarından hesab edilir. 76 yaşlı klub son mövsümdə çempionatı 7-ci pillədə başa vurub.
