"Nizamiyə ötürməni necə verdim? Ayağımla(gülür). Yaxşı oyun oynadıq və qalib gəldik". Bu sözləri Sportnet.az-a açıqlamasında "İnter"in forvardı Pərdis Fərcad-Azad Avropa Liqasının birinci təsnifat mərhələsinin "Mladost"la cavab oyunu haqda danışarkən deyib.
Serbiya klubu ilə hər iki oyunda da meydana start heyətində çıxan Pərdis komandasının qələbəsində pay sahibi oldu. Forvardın bildirdiyinə görə, cavab qarşılaşmasında vurduqları erkən qol və rəqibin qırmızı vərəqə alması qələbələrində önəmli rol oynadı. Bundan savayı Zaur Svanadzenin ondan narazı olmadığını deyib: "Təbii ki, qalib gəldiyimizə görə şadam. Bunun davamını gətirmək istəyirik. "Mladost” fiziki cəhətdən çox güclüdür və yaxşı da futbol oynayırlar. Serbiyadakı matç da olduqca ağır alınmışdır. Sadəcə bizim bəxtimiz də gətirdi.
Cavab oyunu da pis alınmadı. Erkən qol vurduq, rəqibin oyunçusu qırmızı vərəqə aldı. Bütün bunlar bizim işimizi bir az asanlaşdırdı. Zaur Svanadzenin oyun zamanı məndən narazı olduğunu eşitməmişəm. Məncə, razıdır məndən”.
