"Bu, ilk oyunumuz idi. Həm bizə, həm də rəqibə ağır oldu. Daha çox - 3-4 top da vura bilərdik. Amma nə edəsən? Futbolda hər şey olur. "Kəpəz" də mübariz oyun sərgilədi. Stadionda kim canını qoydusa, kim sonadək mübarizə apardısa, o da qələbə qazandı. "Kəpəz"ə də, özümüzə də uğurlar arzulayıram".
Sportnet.az-ın məlumatına görə, bunu "Sumqayıt"ın futbolçusu Cavid İmamverdiyev "Kəpəz"i 2:1 hesabı ilə yendikləri Azərbaycan Premyer Liqasının ilk tur matçından sonra deyib. Yeni transfer 16-cı dəqiqədə vurduğu gözəl qol barədə də danışıb. O, belə zərbələrin davamlı olmasını arzulayıb: "Qoldur da, oldu. Bunu şişirtməyə də ehtiyac yoxdur. Necə vurursansa, vur, əsas odur ki, qol olsun və qələbə qazanasan".
Qarşıda "Sumqayıt"ı "Qəbələ" ilə səfər oyunu gözləyir. 27 yaşlı yarımmüdafiəçi yenə əzmkar oyunla azarkeşləri sevindirməyə çalışacaqlarını vurğulayıb.
