Bakı Olimpiya Stadionunun (BOS) ot örtüyünün "Qarabağ" klubunun Çempionlar Liqasında keçirəcəyi ev oyunları üçün hazırlanma prosesinə tanınmış mütəxəssis Fil Şarples də cəlb olunub. Bu barədə Sportnet.az-a "Qarabağ"ın baş meneceri Asif Əsgərov məlumat verib.
Onun sözlərinə görə, Tofiq Bəhramov adına Respublika stadionunun qazonunun təmirində də iştirak etmiş ingiltərəli futbol meydanları üzrə direktor BOS-da da eyni işə yardımçı olur. Klub rəsmisi stadionun ot örtüyünün sentyabrın 27-də İtaliya "Roma"sı ilə keçiriləcək ilk ev oyununadək hazır olacağını söyləyib. O, AFFA ilə Gənclər və İdman Nazirliyinin də köməyini əsirgəmədiyini bildirib.
Qeyd edək ki, Fil Şarples Azərbaycana "Qəbələ" klubu tərəfindən dəvət olunub. O, Qəbələ şəhər stadionunda futbol meydanlarının ideal vəziyyətə gətirilməsində böyük rol oynayıb. Daha sonra təcrübəli mütəxəssis Respublika stadionunda da eyni işi görüb.
