"Qarabağ" Cənubi Afrika Respublikasının "Mamelodi Sandaunz" klubunda çıxış edən Xama Billiatın transferindən imtina edib.
Sportnet.az-ın əldə etdiyi məlumata görə, buna zimbabveli hücumçunun fiziki göstəriciləri və baş məşqçi Qurban Qurbanovun taktiki sxeminə uyğun gəlməməsi səbəb olub. 28 yaşlı forvard hazırkı komandasında daha çox hücumçuların arxasında çıxış edir. "Qarabağ"ın oyun sistemində isə belə bir mövqe yoxdur. Digər tərəfdən, Billiat texnikalı futbolçu olsa da, fiziki cəhətdən cılızdır. Qurbanov isə hazırda taran tipli hücumçu axtarışındadır.
Mənbə bildirir ki, afrikalı forvard qış transfer dövründə həqiqətən də "Qarabağ"ın maraq dairəsində olub. Lakin həmin vaxt "Mamelodi Sandaunz"la müqaviləsi davam etdiyindən, Billiatla bağlı danışıqlar dondurulub. Sonradan futbolçu Ağdam klubunun nümayəndələri tərəfindən bir müddət izlənildikdən sonra transferinə ümumiyyətlə ehtiyac duyulmayıb.
Qeyd edək ki, Xama Billiat "Mamelodi Sandaunz"un heyətində CAR çempionu olub. O, klubla yeni müqavilə imzalamaqdan imtina edib.
