"Neftçi" klubu futbol üzrə Avropa Liqasında mübarizəyə qələbə ilə başlayıb.
Sportnet.az-ın məlumatına görə, flaqman Macarıstan "Uypeşt"ini I təsnifat mərhələsinin ilk görüşündə 3:1 hesabı ilə məğlub edib. Hesabı 8-ci dəqiqədə Daniel Naginin qolu ilə qonaq komanda açıb. Lakin 24 və 71-ci dəqiqələrdə Baqali Dabo "dubl" edib. Oyunda son nöqtəni isə uzatma dəqiqəsində Emin Mahmudov qoyub.
Beləliklə, "Neftçi" iyulun 19-da keçiriləcək cavab görüşü üçün ciddi üstünlük əldə edib.
-----------------------
Azərbaycanın "Qəbələ" və "Keşlə" klubları Avropa Liqasına məğlubiyyətlə başlayıblar. Sportnet.az-ın məlumatına görə, hər iki komanda I təsnifat mərhələsində ilk görüşdəcə uduzaraq, növbəti mərhələ şanslarını çətinləşdirib.
"Qəbələ" öz meydanında Lüksemburq "Proqres"inə yenilib - 0:2. Hər iki qol fasilədən sonra vurulub. Mayron de Almeyda 51-ci dəqiqədə hesabı açıb. Olivye Till isə bundan 10 dəqiqə sonra penaltini dəqiq yerinə yetirib.
"Keşlə" isə Maltada "Baltsan"la qarşılaşmada darmadağın olub - 1:4. Hesabı 12-ci dəqiqədə Alfred Effionq açıb. 21-ci dəqiqədə Leklao fərqi artırıb. 29-cu dəqiqədə Sezar Meza Kolli penaltidən fərqi azaltsa da, 34-cü dəqiqədə Boyan Kalyeviç "Baltsan"ın üçüncü qolunu vurub. Oyunda son nöqtəni isə 55-ci dəqiqədə Kadu qoyub.
Hazırda Azərbaycanın Avroliqadakı daha bir təmsilçisi "Neftçi"nin Macarıstan "Uypeşt"i ilə görüşü davam edir. İlk yarıdan sonra hesab bərabərdir - 1:1.
Cavab görüşləri iyulun 19-da keçiriləcək.
----------------------------
Bu gün Azərbaycan klubları UEFA Avropa Liqasında mübarizəyə başlayacaqlar.
Sportnet.az xəbər verir ki, I təsnifat mərhələsində ölkəni 3 komanda – Premyer Liqanın gümüş və bürüncü mükafatçıları olan "Qəbələ” ilə "Neftçi”, eləcə də Azərbaycan Kubokunun qalibi "Keşlə” təmsil edəcək.
Maltanın "Baltsan” kollektivinə rəqib olan "Keşlə” ilk görüşünü səfərdə keçirəcək. Yuri Maksimovun rəhbərlik etdiyi komanda növbəti mərhələyə yüksəlmək üçün evə sərfəli nəticə ilə dönməyə çalışacaq. Bakılılar heyətində 12 legionerin yer aldığı meydan sahibləri ilə ən azı heç-heçə edərlərsə, bu, müsbət nəticə sayılacaq.
İlk oyunlarını evdə keçirəcək "Qəbələ” və "Neftçi” yeni baş məşqçilərinin rəhbərliyi altında ilk rəsmi matçlarına çıxacaqlar. Mövsüm başa çatandan sonra müvafiq olaraq, ukraynalı Roman Qriqorçuku Sənan Qurbanov, Tərlan Əhmədovu isə italiyalı Roberto Bordin əvəzləyib.
Qəbələ şəhər stadionunda Lüksemburq "Proqres”ini qəbul edəcək "qırmızı-qaralar” görüşün favorit hesab olunurlar. "Qəbələ”nin ilk qarşılaşmada böyükhesablı qələbə qazanma ehtimalı böyükdür.
"Neftçi” isə "Dalğa Arena”da Macarıstanın "Uypeşt” komandasını qəbul edəcək. Fasilə dönəmində bir sıra transferlər həyata keçirməklə yetərincə güclənən paytaxt təmsilçisi cütün taleyini ilk görüşdə həll etməyə çalışacaq. "Ağ-qaralar” qol buraxmadan qələbə qazanarlarsa, böyük üstünlük əldə etmiş olacaqlar.
Qeyd edək ki, "Qəbələ”nin II təsnifat mərhələsindəki potensial rəqibləri "Rabotniçki” ilə Macarıstan "Honved”inin Makedoniyada baş tutan ilk oyununda...
"Keşlə”nin rəqibiləri - Moldova "Milsami”si bu gün Slovakiyanın "Slovan” komandasını qəbul edəcək. "Neftçi”nin potensial rəqibi olan İspaniya təmsilçisi "Sevilya” isə mübarizəyə birbaşa II təsnifat mərhələsindən başlayacaq.
Avropa Liqası
I təsnifat mərhələsi, ilk oyunlar
20:00. "Baltsan” (Malta) – "Keşlə” (Azərbaycan) - 4:1
Qollar: Alfred Effionq,13. Lekao, 21. Boyan Kalyeviç, 34. Kadu, 55 - Sezar Meza Kolli, 29 (pen.)
Hakimlər: Volen Çinkov, Georgi Doynov, Deniz Sokolov, Draqomir Draqanov (hamısı Bolqarıstan)
Hakim-inspektor: Pyetur Siqurdsson (İslandiya)
UEFA nümayəndəsi: Pol Lion (Cəbəllütariq)
Ta Qali. "Sençeneri" stadionu
20:00. "Qəbələ” (Azərbaycan) – "Proqres” (Lüksemburq) - 0:2
Qollar: Mayron de Almeyda, 51, Olivye Till, 61 (penalti ilə)
Hakimlər: Vyaçeslav Banar, Vasili Ermiskin, Dmitri Çobanu, Andrey Kojokaru (hamısı Moldova)
Hakim-inspektor: İqor Pristovnik (Xorvatiya)
UEFA nümayəndəsi: Nikoloz Jqarkava (Gürcüstan)
Qəbələ şəhər stadionu
21:00. "Neftçi” (Azərbaycan) – "Uypeşt” (Macarıstan) - 3:1
Qollar: Baqali Dabo, 24; 71. Emin Mahmudov, 90+2 - Daniel Nagi, 8
Hakimlər: Dennis Hiqler, Yoost van Zuylen, Yohan Balder, Simen Mulder (hamısı Hollandiya)
Hakim-inspektor: Stavros Tritsonis (Yunanıstan)
UEFA nümayəndəsi: İvan Tsitoviç (Rusiya)
Bakı. "Dalğa Arena”.
