"Qarabağ"ın Avropa Liqasının qrup mərhələsindəki rəqiblərindən olan "Arsenal" klubu İngiltərə Premyer Liqasında IV tur matçına çıxıb.
Sportnet.az-ın məlumatına görə, "topçular" səfərdə "Kardiff Siti" ilə qarşılaşıb. Görüş qonaqların 3:2 hesablı qələbəsi ilə yekunlaşıb. "Arsenal"ın qollarını 11-ci dəqiqədə Şkodran Mustafi, 62-ci dəqiqədə Pyer-Emerik Obameyanq, 81-ci dəqiqədə Aleksandr Lyakazett vurub. Meydan sahiblərindən isə Viktor Kamarasa və Denni Uord fərqlənib. Sərt mübarizə şəraitində keçən görüşdə baş hakim Entoni Teylor yerli komandaya 3, qonaqlara 4 sarı vərəqə göstərib.
Bu qələbə sayəsində xallarını 6-ya çatdıran "Arsenal" 9-cu pillədə qalıb. 2 xala malik "Kardiff Siti" isə 16-cıdır.
Qeyd edək ki, "Arsenal"ın Avropa Liqasında ilk səfər matçı Bakıda olacaq. Görüş oktyabrın 4-də keçiriləcək.
