İspaniyanın "Real Madrid" klubu baş məşqçi Xulen Lopetegini istefaya göndərib.
Sportnet.az klubun rəsmi saytına istinadən xəbər verir ki, təcrübəli mütəxəssislə müqaviləyə vaxtından əvvəl xitam verib. Direktorlar Şurası bu qərarı komandanın nəticələrinin qənaətbəxş olmaması ilə əlaqələndirib. Baş məşqçinin vəzifələrini müvəqqəti olaraq bundan əvvəl "Kastilyo" klubuna rəhbərlik etmiş Santyaqo Solariyə tapşırılıb. Argentinalı mütəxəssis oktyabrın 30-dan klubda işə başlayacaq.
"Real Madrid" oktyabrın 28-də "Barselona" ilə El Klasiko matçında 1:5 hesabı ilə məğlub olub. Komanda keçirdiyi son 7 oyundan 5-də uduzub və 10 turdan sonra La Liqada 9-cu yerdə qərarlaşıb.
Lopetegi komandaya 2018-ci ilin iyununda gətirilib. O, Zinəddin Zidanı əvəzləyib. 52 yaşlı mütəxəssis bundan əvvəl İspaniya yığmasında, "Portu" klubunda və digər komandalarda işləyib.
