"Yuventus"a rəhbərlik edən Massimiliano Alleqri İtaliya A Seriyasının ən yaxşı baş məşqçisi seçilib.
Sportnet.az-ın məlumatına görə, 51 yaşlı mütəxəssis karyerasında dördüncü dəfə "Qızıl skamya" mükafatına layiq görülüb. 17 səs yığan Alleqri ən yaxın izləyiciləri "Napoli"ni İngiltərənin "Çelsi" komandasına dəyişən Mauritsio Sarri və "Latsio"nun sükanı arxasındakı Simone İnzagini 9 səs qabaqlayıb.
Bununla da "Yuventus"un baş məşqçisi yeni rekord müəyyənləşdirib. O, hərəyə 3 dəfə ən yaxşı sayılmış Marçello Lippi, Antonio Konte və Fabio Kapellonu üstələyib. Alleqri 2011-ci ildə "Kalyari"də, 2015 və 2016-cı illərdə isə Yuventus"da ən yaxşı baş məşqçi sayılıb.
Qeyd edək ki, ötən mövsüm "Yuventus" "Napoli"ni üstələyərək, çempion olub.
