Topaz Premyer Liqasında XIII turun daha bir oyunu keçirilib.
Sportnet.az xəbər verir ki, "Sumqayıt" yenidən təmir olunaraq istifadəyə verilmiş "Kapital Bank Arena"da "Səbail"i sınağa çəkib. Görüş meydan sahiblərinin 1:0 hesablı qələbəsi ilə yekunlaşıb. Yeganə qolu 60-cı dəqiqədə Atilla Yıldırım vurub.
Bu qələbə sayəsində "Sumqayıt" xallarını 14-ə çatdırsa da, yenə 6-cı pillədə qalıb. "Səbail" isə 20 xalla 3-cüdür.
Qeyd edək ki, turun açılış oyununda "Neftçi" səfərdə "Sabah"a qalib gəlib - 2:1. Dekabrın 2-də "Qəbələ" "Zirə"ni, dekabrın 3-də isə "Qarabağ" "Keşlə"ni qəbul edəcək.
------------------------
Topaz Premyer Liqasında XIII tura start verilib.
Sportnet.az xəbər verir ki, həftənin açılış matçında debütant "Sabah" lider "Neftçi"ni qəbul edib. Masazır qəsəbəsində yerləşən "Əlincə Arena"da baş tutan oyun qonaqların qələbəsi ilə başa çatıb - 2:1.
Görüşdə hesabı 21-ci dəqiqədə Anton Krivotsyuk açıb. Gəl ki, Tural Axundovun ikinci sarı vərəqdən sonra meydandan qovulması ilə "ağ-qaralar" azlıqda qalıblar. Lakin matçda növbəti qolu da "Neftçi" vurub. Mirabdulla Abbasov 39-cu dəqiqədə rəqibi məyus edib.
Oyunun 70-ci dəqiqəsində "Sabah"ın müdafiəçisi Vanderson Silva ikinci sarı vərəqəsini alaraq meydandan qovulub. Bundan 4 dəqiqə sonra zədədən sonra meydana dönən debütantın "qol maşını" Marko Deviç fərqi azaldıb.
Qarşılaşmanın 83-cü dəqiqəsində simulyasiyaya görə ikinci "sarı"sını görən Baqali Dabo yenidən qonaqları azlıqda qoyub.
Cari çempionatda 10-cu qələbəsini qazanan "Neftçi" xalını 32-yə çatdırıb və fasiləyə bir tur qalmış qış çempionu olub. "Sabah" isə 17 xalla 4-cü yerdədir.
Qeyd edək ki, bu gün saat 19:00-da "Sumqayıt" - "Səbail" oyunu start götürəcək. Sabah "Qəbələ" - "Zirə"ni matçı olacaq. Bazar ertəsi isə "Qarabağ" "Keşlə"ni qəbul edəcək.
-----
Bu gün Topaz Premyer Liqasında XIII tura start veriləcək.
Sportnet.az xəbər verir ki, üç günü əhatə edəcək turun açılış matçında çempionatın debütantı "Sabah" doğma meydanda "Neftçi" ilə üz-üzə gələcək. Komandalar arasındakı ilk dövrədəki oyunda flaqman qələbə qazanıb - 2:0. "Sabah" turnir cədvəlində 17 xalla dördüncü, "Neftçi" isə 29 xalla birinci pillədə qərarlaşıb.
Günün digər matçında "Sumqayıt" "Səbail"i qəbul edəcək. "Gənclik şəhəri" təmsilçisi mövsümdə ilk dəfə "Kapital Bank Arena"da oyuna çıxacaq. Arena bu vaxta qədər təmirdə olduğu üçün "Sumqayıt" ev oyunlarını paytaxtda keçirib. Komandalar indiyədək çempionatda 5 dəfə qarşılaşıblar və eyni sayda - 2 dəfə qələbəyə seviniblər. Bir görüşdə isə qalib müəyyənləşməyib. Topların fərqi də bərabərdir - 4:4. Son iki oyunun hərəsində 2 qol vuran "Səbail” qalib gəlib. "Gənclik şəhəri" təmsilçisi isə öz meydanında rəqibini məğlub edə bilməyib. "Səbail" 20 xalla üçüncü, "Sumqayıt" isə 11 xalla 6-cı yerdədir.
1 dekabr (şənbə )
16:30. "Sabah” – "Neftçi” - 1:2
Qollar: Marko Deviç, 76 - Anton Krivotsyuk, 21. Mirabdulla Abbasov, 39
Qırmızı vərəqə: Tural Axundov, 33 ("Neftçi", ikinci sarı). Vanderson Silva, 70 ("Sabah", ikinci sarı). Baqali Dabo, 83 ("Neftçi", ikinci sarı)
Hakimlər: Rəhim Həsənov, Yaşar Abbasov, Cavanşir Yusifov, Ramil Əhmədov
Hakim-inspektor: Murad Məmmədov
AFFA nümayəndəsi: Seymur Səlimli
"Əlincə Arena”
İlk dövrə - 0:2
19:00. "Sumqayıt” – "Səbail” - 1:0
Qol: Atilla Yıldırım, 60
Hakimlər: Əliyar Ağayev, Rza Məmmədov, Akif Əmirəli, Rauf Allahverdiyev
Hakim-inspektor: Fizuli Nəcəfov
AFFA nümayəndəsi: Eldar Qasımov
"Kapital Bank Arena”
İlk dövrə - 0:2
Qeyd edək ki, turun digər matçı sabah keçiriləcək. "Qəbələ" doğma meydanda "Zirə" ilə münasibətlərə aydınlıq gətirəcək. Tura dekabrın 3-ü keçiriləcək "Qarabağ" - "Keşlə" görüşü ilə yekun vurulacaq.
