UEFA Çempionlar Liqasında yarımfinal mərhələsinə vəsiqə qazanan ilk 2 komandanın adı müəyyənləşib.
Sportnet.az-ın məlumatına görə, bunlar İspaniya "Barselona"sı ilə Hollandiya "Ayaks"ıdır. Onlar 1/4 final mərhələsində müvafiq olaraq, İngiltərənin "Mançester Yunayted" və İtaliyanın "Yuventus" klublarını mübarizədən kənarlaşdırıb.
Hər iki cavab görüşündə qapılara 3 qol vurulub. "Barselona" İngiltərədəki ilk görüşdə 1:0 hesabı yendiyi "Mançester Yunayted"i "Nou Kamp"da darmadağın edib. İlk iki qolu 16-cı və 20-ci dəqiqələrdə Lionel Messi vurub. Son nöqtəni isə 61-ci dəqiqədə Filippe Koutinyo qoyub. 12-ci dəqiqədə isə almaniyalı baş hakim Feliks Brıx meydan sahiblərinin lehinə penalti təyin etsə də, VAR sisteminə müraciətdən sonra qərarını ləğv edib.
Gecənin sensasiyası isə İtaliyada qeydə alınıb. "Yuventus" Hollandiyada 1:1 hesablı heç-heçə etdiyi "Ayaks"a öz meydanında məğlub olub - 1:2. Hərçənd, hesabı 28-ci dəqiqədə Kriştianu Ronaldu açıb. Həmin epizodda qonaqlar qayda pozuntusunun olduğunu iddia etsələr də, VAR sisteminə müraciətdən sonra fransalı referi Kleman Türpen qərarını qüvvədə saxlayıb. Bundan cəmi 6 dəqiqə sonra Donni van de Beek bərabərlik qolunu vurub. Bu qol da VAR-a baxıldıqdan sonra rəsmiləşib. 67-ci dəqiqədə isə amsterdamlıların kapitanı Matteys De Liqt qələbə topuna imza atıb. Bununla da "Ayaks" tarixində ilk dəfə "Yuventus"a qalib gəlib.
1/4 final mərhələsinin daha 2 cavab görüşü bu gün keçiriləcək. İngiltərədə "Mançester Siti" "Tottenhem"i, Portuqaliyada isə "Portu" İngiltərə "Liverpul"unu qəbul edəcək. İlk görüşlərdə "Tottenhem" 1:0, "Liverpul" isə 2:0 hesabı ilə qalib gəlib. Bu cütlərin qalibləri müvafiq olaraq, "Ayaks" və "Barselona"ya rəqib olacaqlar.
------------------------
Bu gün UEFA Çempionlar Liqasında 1/4 final mərhələsinin ilk iki cavab görüşü keçiriləcək.
Sportnet.az-ın məlumatına görə, qarşılaşmalar İtaliya və İspaniyada təşkil olunacaq. “Yuventus“ Hollandiya “Ayaks”ını, “Barselona” isə İngiltərə “Mançester Yunayted”ini qəbul edəcək. Səfərdəki ilk oyundan 1:1 hesablı heç-heçə ilə ayrılan “Yuventus”a yarımfinala yüksəlmək üçün doğma meydanda qolsuz heç-heçə də kifayət edəcək. “Ayaks” isə tarixdə ilk dəfə Turində qələbə qazanmaq üçün meydana çıxacaq. Hərçənd, amsterdamlıları 2:2-dən başlayaraq, məhsuldar heç-heçələr də qane edir.
Bu matçda Hollandiya komandasının heyətində Nikolas Talyafiko cəzalı olduğu üçün iştirak etməyəcək. Hassan Bande zədə səbəbindən oyunu buraxacaq. Əzələsində kiçik zədəsi olan Frenki de Yonqun oyunda iştirak edib-etməyəcəyi sual altındadır. “Qoca Sinyora”nın heyətində cəzalı futbolçu yoxdur. Zədəli Martin Kaseres, Mattia Perin, Andrea Bartsalyi və Emre Canın matçı buraxacağı isə dəqiqdir.
Gecənin digər matçına gəldikdə, evdə 0:1 hesabı ilə məğlub olan Ule Qunnar Sulşerin baş məşqçi olduğu kollektivin cavab qarşılaşmasında qələbədən başqa şansı yoxdur. “Mançester Yunayted” 20 il əvvəl məhz "Nou Kamp"da Almaniya "Bavariya"sını finalda 2:1 hesabı ilə məğlub edərək, tarixində ikinci dəfə Çempionlar Liqasının qalibi olub. Həmin görüşdə Sulşer futbolçu qismində iştirak edib. 81-ci dəqiqədə meydana daxil olan norveçli hücumçu 90+3-cü dəqiqədə komandasının qələbə topunu vurub.
“Barselona” isə doğma meydanda keçirdiyi 4 qarşılaşmanın heç birində “qırmızı şeytanlar”a məğlub olmayıb - 2 qələbə 2 heç-heçə. Kataloniya təmsilçisi həmçinin Çempionlar Liqasında “Nou Kamp”da keçirdiyi ardıcıl 30 matçda məğlubiyyətin nə olduğunu bilmir. Qonaqların heyətində Lük Şou cəza, Erik Bayi, Matteo Darmian, Antonio Valensiya və Aleksis Sançes isə zədəyə görə meydana çıxa bilməyəcək. Meydan sahiblərində isə cəzalı və zədəli futbolçu yoxdur.
Çempionlar Liqası
1/4 final, cavab oyunları
16 aprel
23:00 "Barselona" (İspaniya) - "Mançester Yunayed" (İngiltərə) - 3:0
Qollar: Lionel Messi, 16; 20. Filippe Koutinyo, 61
Baş hakim: Feliks Brix (Almaniya)
Barselona, "Nou Kamp" stadionu
İlk oyun - 1:0
23:00 - "Yuventus" (İtaliya) - "Ayaks" (Hollandiya) - 1:2
Qollar: Kriştianu Ronaldu, 28 - Donni van de Beek, 34. Matteys De Liqt, 67
Baş hakim: Klemen Turpin (Fransa)
Turin. "Juventus Stadium"
İlk oyun - 1:1.
