"Bizim üçün hər oyun vacibdir. Onlardan biri də sabahkı matçdır. Hamımız qələbə gözləyirik. Lakin əsas məsələ öz futbolumuzu sərgiləməkdir".
Sportnet.az-ın məlumatına görə, bunu “Qarabağ”ın baş məşqçisi Qurban Qurbanov oktyabrın 24-də UEFA Avropa Liqasının qrup mərhələsinin III turunda Kiprin APOEL komandasına qarşı Bakıda keçirəcəkləri oyundan əvvəl deyib.
47 yaşlı mütəxəssis Tofiq Bəhramov adına Respublika stadionunda baş tutan mətbuat konfransında sualları da cavablandırıb.
- Mahir Emreli və Xayme Romeronun durumu necədir? Araz Abdullayev "18-lik"də olacaqmı?
- Mahir Emreli və Xayme Romero komanda ilə məşqlərə başlayıb. Onların "18-lik"də olmaq ehtimalları çoxdur. Sabahkı məşqdən sonra qərar verəcəyik. Araz Abdullayev də böyük ehtimalla "18-lik"də olacaq.
- Avqustda qarşılaşdığınız APOEL ilə indiki komanda arasında nə kimi fərqlər var?
- O vaxt yeni baş məşqçi gəlmişdi. Komanda istəkli idi və hansı oyun üslubunda oynayacaqlarını bilmirdik. Ancaq indi daha çox bir yerdədirlər, daha təcrübəli olublar. Hər bir çətinliyiə hazır olmalıyıq.
- "Qarabağ"ın qrupdan çıxma şansı nə qədərdir?
- Faizlə demək istəməzdim. Qrupdakı digər nəticələri gördünüz. Bu oyuna görə fikir bildirmək düz deyil. Son matça qədər mübarizə gedəcək. Bütün komandaların qrupdan çıxmaq şansı var.
- Avrokuboklarda eyni komanda ilə bir mövsümdə üçüncü dəfə qarşılaşmaq nə dərəcədə çətindir?
- Psixoloji cəhətdən üstün cəhətləri var. Mənfi tərəflərini də qeyd etməliyəm. Həm "Qarabağ", həm də APOEL üçün çətin olacaq. Hər iki komanda bir-birini daha yaxından tanıyır, yaxşı analiz edə bilər. Həddindən artıq istəkli olmalıyıq. Üstünlüyü bunda axtarmalıyıq. Oyun üslubumuzu yaxşılaşdırmalı və istəyimizi də artırmalıyıq. Çempionatda da bir rəqiblə eyni mövsümdə 4 dəfə qarşılaşırıq. Məcburuq ki, bu dəfə matça daha ciddi yanaşaq.