"Qarabağ" UEFA Konfrans Liqasının qrup mərhələsində növbəti oyununa çıxıb.
Sportnet.az-ın məlumatına görə, Qurban Qurbanovun baş məşqçi olduğu komanda III turda Qazaxıstanın "Kayrat" klubu ilə üz-üzə gəlib. Tofiq Bəhramov adına Respublika stadionunda keçirilmiş görüş Azərbaycan klubunun əzmkar qələbəsi ilə yekunlaşıb - 2:1.
Ukraynalı FIFA referisi Yevgeni Aranovskinin idarə etdiyi matçda ilk qol 19-cu dəqiqədə vurulub. Qonaq komandanın hücumçusu Joze Kante cərimə meydançasında təkbətək qaldığı qapıçı Şahruddin Məhəmmədəliyevlə mübarizədə yerə yıxılaraq simulyasiyaya əl atıb. Baş hakim isə Məhəmmədəliyevin qaydanı pozduğunu əsas gətirib və penalti təyin edib, üstəlik, ona sarı vərəqə göstərib. Topa yaxınlaşan Kante hesabı açıb.
Ağdam təmsilçisi bu qoldan sonra hücumlarının kəsərini daha da artırıb. Rəqib isə əsasən müdafiədən oynamağa və əks-hücumlara bel bağlamağa başlayıb. Lakin hissənin sonlarına kimi "köhlən atlar"ın bərabərlik qolunu vurmaq istəyi alınmayıb.
İkinci yarıya da "Qarabağ" daha sürətli başlayıb. 70-ci dəqiqədə İbrahima Vadjinin əvəzinə Ramil Şeydayev meydana daxil olub. Məhz bu əvəzləmə matçda ciddi dönüşə səbəb olub. 79-cu dəqiqədə Zubirin cinah asmasından sonra Ozobiçin baş zərbəsi əvvəlcə qapıçı, sonra müdafiəçilərdən qayıdıb, Şeydayev isə özünü topa ataraq başla dəqiq zərbə vurub. Qoldan sonra ağdamlılar tam qüvvə ilə irəli atılıb. 90+1-ci dəqiqə Abbas Hüseynov görüşdə son nöqtəni qoyub.
Beləliklə, ardıcıl ikinci qələbəsini qazanan "Qarabağ" xallarının sayını 7-ə çatdırıb və liderliyini davam etdirib. "Kayrat"ın isə 1 xalı var.
Qeyd edək ki, H qrupunun digər oyununda Kipr "Omoniya"sı İsveçrədə "Bazel"in qonağı olacaq. Matçı Bakı vaxtı ilə saat 23:00-da start götürəcək.
-----------------------------
"Qarabağ" UEFA Konfrans Liqasının qrup mərhələsində bu gün növbəti oyununu keçirəcək.
Sportnet.az-ın məlumatına görə, Qurban Qurbanovun baş məşqçi olduğu komanda H qrupundakı 3-cü sınağında Qazaxıstan "Kayrat"ını qəbul edəcək. Tofiq Bəhramov adına Respublika stadionunda oynanılacaq qarşılaşma saat 20:45-də başlayacaq. Matçı ukraynalı FIFA referisi Yevgeni Aranovski idarə edəcək.
Ağdam təmsilçisinin heyətində 3 futbolçu - Xayme Romero, Bədavi Hüseynov və Elvin Cəfərquliyev zədə səbəbindən görüşü buraxacaq. Qonaqlarda isə komandanın bombardiri Artur Şuşenaçev və Kamo Ohanesyan meydana çıxmayacaq. Şuşenaçev zədəyə görə oynamayacaqsa, erməni müdafiəçi öz istəyilə Bakıya gətirilməyib.
Hazırda "Qarabağ" 4 xalla H qrupuna başçılıq edir. 1 xalı olan "Kayrat" isə 3-cü pillədə qərarlaşıb.
Bu qrupun digər oyununda Kipr "Omoniya"sı İsveçrədə "Bazel"in qonağı olacaq.
UEFA Konfrans Liqası, qrup mərhələsi
H qrupu
III tur
20:45. "Qarabağ" (Azərbaycan) - "Kayrat" (Qazaxıstan) - 2:1
Qollar: Ramil Şeydayev, 79. Abbas Hüseynov, 90+1 - Joze Kante, 19 (pen.)
Hakimlər: Yevgeni Aranovski, Semyon Şlonçak, Andrey Skripka, Vitali Romanov (hamısı Ukrayna)
Bakı, Tofiq Bəhramov adına Respublika stadionu.
Xal durumu: "Qarabağ" - 7 (3 oyuna), "Bazel" - 4, "Omoniya" - 1, "Kayrat" - 1 (3).
