"Neftçi" və "Qəbələ" komandaları 9 ildən sonra yenidən Azərbaycan Kubokunun finalında üz-üzə gələcəklər.
Sportnet.az xəbər verir ki, iyunun 3-də bu klublar ikinci dəfə titul uğrunda görüşə çıxacaqlar.
2014-cü ildə Tofiq Bəhramov adına Respublika stadionunda təşkil olunmuş matçda flaqman qələbə qazanmışdı. Həmin oyunun əsas vaxtı 1:1 hesablı heç-heçə ilə başa çatmış, penaltilər seriyasında isə "ağ-qaralar" üstün olmuşdu - 3:2. Bununla da "Neftçi" tarixində 7-ci dəfə Azərbaycan Kubokunu qazanmışdı.
Həmin vaxtdan paytaxt təmsilçisi kuboka həsrət qalıb. Əvəzində "Qəbələ" 2019-cu ildə "Sumqayıt"a 1:0 hesabı ilə qalib gələrək, tarixində ilk və yeganə titula sahib çıxıb.
Ümumilikdə "Neftçi" 11, "Qəbələ" isə 5 dəfə Azərbaycan Kubokunun finalında çıxış edib.
Qeyd edək ki, mövsümün son qarşılaşması "Bakcell Arena"da olacaq.
