İslamiadaya hazırlıq çərçivəsində Sloveniyada təlim-məşq toplanışında olan kişi voleybolçulardan ibarət Azərbaycan millisi daha bir yoxlama matçı keçirib.
Azərbaycan Voleybol Federasiyasından Sportnet.az-a verilən məlumata görə, komandamız ikinci dəfə Səudiyyə Ərəbistanının yığması ilə üz-üzə gəlib. İlk oyunda 4:1 hesabı ilə qalib gələn Fərid Cəlalovun yetirmələri bu dəfə 3:1 (25:18, 25:22, 25:21, 23:25) hesablı qələbəyə seviniblər.
Qeyd edək ki, yığmamız mayın 6-dək Mariborda təlim-məşq toplanışını davam etdirəcək. Komandamız hazırlıq dövründə keçirdiyi 6 oyunun hamısında qələbə qazanıb.
