Monteneqro "Mladost"unun iyulun 9-da "Neftçi" ilə keçirəcəyi Avropa Liqasının I təsnifat mərhələsinin cavab görüşünün başlama saatının dəyişdirilmə səbəbi açıqlanıb. Sportnet.az-ın "Mladost"un rəsmi saytına istinadən məlumatına görə, oyunun startı isti hava şəraiti ilə əlaqədar gecikdirilib.
Öncədən matçın yerli vaxtla saat 17:00-da (Bakı vaxtı ilə saat 20:00-da) başlaması nəzərdə tutulmuşdu. Lakin Çernoqoriya təmsilçisi UEFA-ya müraciət edərək, paytaxt Podqoritsada hava şəraitinin isti olduğunu bildirib və start fitinin gec çalınmasını xahiş edib. Avropa futbol qurumu isə "Neftçi"nin razılığını aldıqdan sonra müraciəti müsbət cavablandırıb.
Qeyd edək ki, "Mladost" - "Neftçi" matçı Bakı vaxtı ilə saat 23:30-da başlanacaq.
