"İnter"in yeni transferi, Gürcüstanın "Dinamo" (Tbilisi), Şotlandiyanın "Reyncers", İngiltərənin "Blekbern Rovers" və "Nyukasl", eləcə də Türkiyənin "Kayserispor" kimi klubların formasını geyinmiş Zurab Xizanişvilinin Sportnet.az-a müsahibəsi
- "İnter"lə 6 aylıq müqavilə bağlamısınız. Burda özünüzü necə hiss edirsiniz?
- Çox yaxşı. Çünki mən bu klubu uzun müddətdir ki, tanıyıram. Kaxaber Tsxadadze burda işləyib, çoxlu gürcü futbolçular "İnter"də oynayıb. Hamı bu komanda haqda müsbət fikirdədir. İlk dəfə Azərbaycana gəldim. Gəldim ki, Şotlandiya, İngiltərə və Türkiyədəki təcrübəmdən bu komandaya köməyim dəysin.
- Yeni baş məşqçiniz Zaur Svanadze şəxsən sizi Azərbaycana dəvət etdi?
- Bəli. Açığı, mənim Türkiyədən təklifim vardı. Ancaq onun mənə zəngindən sonra Azərbaycanda oynamağa qərar verdim. Çünki həm Svanadzeni, həm də "İnter"i yaxından tanıyırdım. Bu amil Türkiyəyə getməyimə mane oldu.
- Bura gəlməzdən öncə "İnter" haqda başqa nələr bilirdiniz?
- Hamı bu komanda haqda müsbət fikirdədir. Bilirəm ki, bu komanda Azərbaycan çempionatında daim ilk yerlər uğrunda mübarizə aparıb. Baçana Tsxadadze, Aleksandr Amisulaşvili, Laşa Salukvadze, eləcə də yaxın dostum Aleksandr İaşvili bu komanda haqda mənə ancaq müsbət sözlər deyib.
- "İnter"də indi çoxlu yeni oyunçular var. Adaptasiya prosesi necə gedir?
- Bəli, çətindir. Yeni oyunçuların bir araya gətirilib eyni futbolu nümayiş etdirməsi üçün vaxta ehtiyac var. Ola bilər ki, 3-4 oyunçu ötən mövsüm bu komandada çıxış edib. Ancaq ümumi götürdükdə çox futbolçu komandaya yeni gəlib. Ümid edirəm ki, Albaniyanın "Laçi" komandası ilə Avroliqa matçında biz qalib gələrək növbəti mərhələyə keçəcəyik və fiziki-taktiki yöndə uyğunlaşmağımız üçün bir qədər də vaxt udacağıq.
- 0:0 nəticəsinin sizə sərf etdiyini düşünsək, "İnter"in bu gün müdafiədən oynayacağını düşünmək olarmı?
- Əsla, yox. Düzdür, 0:0 hesabı bizim işimizə yarayır. Amma bu düşüncə ilə meydana çıxsaq, uduzacağıq. Fikrimcə, Laç şəhərindəki ilk oyunda olduğu kimi, biz ilk dəqiqələrdən hücum futbolu oynayacağıq.
