"Xorvatiyadan sonra bizi daha bir çətin oyun gözləyir. Maltanın son oyununu izləmişəm. Baxmayaraq ki, məğlub oldular, İtaliya çətinliklə qol vurdu". Sportnet.az-ın məlumatına görə, bunu Azərbaycan yığmasının baş məşqçisi Robert Prosineçki deyib.
AVRO-2016-nın seçmə qrup mərhələsində səfərdə Malta ilə qarşılaşma haqda danışan xorvatiyalı mütəxəssis artıq həmyerliləri ilə oyunun geridə qaldığını deyib: "Mənim futbolçuların peşəkardır və bilirlər ki, Xorvatiya ilə oyun geridə qaldı. Sabah Malta millisinə uduzsaq belə, turnir cədvəlində 1 xal öndə olacağıq. Heç bir təzyiq yoxdur. Futbolçularıma güvənirəm. Çalışacağıq ki, sabah qələbə qazanaraq, fərqi artıraq".
Baş məşqçi qrupda 3-cülük uğrunda yarışdan kənarda qalmalarının komandada psixoloji gərginlik yaratmasına bu cür münasibət bildirib: "Təəssüflər olsun ki, Azərbaycan mərhələni pis başlayıb və mən hər oyunu fikirləşirəm. Baxmayaraq ki, şansımız azdır, amma komandada inam qayıdıb".
R.Prosineçki Xorvatiya ilə oyunla müqayisədə start heyətində ciddi dəyişikliyin olmayacağını söyləyib: "Mən oyuna bir neçə gün qalmış heyəti açıqlayıram: Kamran Ağayev, Məhəmməd Mirzəbəyov, Rəşad Sadıqov, Bədavi Hüseynov, Arif Daşdəmirov, Qara Qarayev, Rahid Əmirquliyev, Dmitri Nazarov, Ruslan Qurbanov, Cavid Tağıyev, Əfran İsmayılov".
Baş məşqçi Eddi İsrafilovla bağlı sualı isə belə cavablandırıb: "Eddi "Eybar"da 1 oyun keçirməyib. Onun zədəsi vardı. Düzdür, tam sağaldıb, amma fiziki durumu imkan vermir ki, ilk dəqiqələrdən meydanda olsun. Bu dəfə istədim ki, Eddi gəlsin və onun formasını görüm. Sabahkı oyunda daha çox vaxt verəcəyəm ki, oynasın. O, yaxşı futbolçudur".
Təcrübəli mütəxəssis Maltada havanın isti olmasına və bunun komandaya təsirindən danışıb: "Hava şəraitini canlı yaşayırıq. Bunu dəyişdirmək olmaz, Bakıda da hava istidir. Məşqi oyun vaxtına saldım ki, öyrəşək. Malta da eyni şəraitdə oynayacaq. Bu bəhanə ola bilməz".
O, Pavel Paşayevlə bağlı planlarını söyləyib: "Pavel klubunda həmişə oynamır. Son bir neçə oyunda meydana çıxıb. O, maraqlı oyunçudur. Son iki oyunda Mirzəbəyova üstünlük verirəm, çünki o yaxşı oynayır. Norveçlə oyunda Pavel millinin düşərgəsinə zədəli gəlmişdi. Təəssüflər olsun ki, Norveçlə oyunda kömək edə bilmədi. Ümumilikdə pis təsir bağışlamadı, amma tam razı qalmadım. Onu milliyə çağıracağam və meydana çıxma şansları da olacaq".
Qeyd edək ki, Malta - Azərbaycan matçı sabah Bakı vaxtı ilə saat 21:00-da başlayacaq.
