Sabiq FİFA referisi Fariz Yusifov apasport.az-a müsahibəsində Azərbaycan Premyer Liqasında VI turun "Qarabağ" - "Neftçi" matçındakı mübahisəli penalti qərarından danışıb. Sportnet.az həmin müsahibəni təqdim edir...
- Matç çoxdan bitsə də, oyunla bağlı müzakirələr bitmək bilmir. Əksəriyyət qonaqların qapısına penalti təyin etdiyiniz epizodda qayda pozuntusunun olmadığını düşünür. Hakimlər Komitəsinin (HK) sədri Xaqani Məmmədov da saytımıza müsahibəsində həmin fikri təsdiqləyib...
- Mənim sədrim deyib ki, penalti yox idi?
- Bəli, Xaqani müəllimin özü də 11 metrlik cərimə zərbəsinin təyin edilməsini yanlış hesab edir...
- Mənim fikrim meydanda olur. Çıxartdığım qərarda heç vaxt səhv edə bilmərəm. Bir-iki saytda oxuyuram ki, yazırlar şablon təyin olunmuş qayda pozuntusudur. Şablon sözü Konstitusiyada qayda-qanun deməkdir. Açın, baxın 12-ci oyun qaydasına, orda göstərilir ki, rəqibi tutmaq və itələmək nədir? Mən qaydalardan kənar heç bir qərar verməmişəm. Qaydalar nə deyirsə, ona uyğun hərəkət etmişəm. O, mənim günahım deyil ki, epizod 90-cı dəqiqədə baş verir, yoxsa oyunun əvvəlində.
- Qərarınızın yanlış olmadığını və qaydalara əsasən hərəkət etdiyinizi deyirsiniz. Onda belə çıxır ki, sizi haqsız sayan HK sədri Xaqani Məmmədovun qaydalardan xəbəri yoxdu?
- Bu nə sözdür? Mənim sədrim barədə niyə belə fikirdəsiniz?
- Sizin dediklərinizdən elə çıxır. Doğru qərar verdiyinizi bildirirsiniz, halbuki Xaqani Məmmədov həmin epizodda yanlış qərar qəbul etdiyinizi düşünür. Burdan hansı qənaətə gəlmək olar?
- Mən sədrimin sözlərinə cavab verməliyəm, yoxsa öz etdiyim hərəkətə görə? 12-ci oyun qaydalarında göstərilmiş bəndə uyğun hərəkət etmişəm. Qaydalara uyğun cərimə zərbəsidir, vəssalam.
- Həmin qarşılaşmada köməkçilərinizin işindən necə, razı qaldınızmı?
- Mən oyun barədə bir söz deyə bilmərəm. Bu barədə matçın hakim-inspektoru danışa bilər. Qiymətləndirmə sisteminə o cavabdehdir, mən yox.
- Yeri gəlmişkən, Xaqani Məmmədov müsahibəsində Sizin cəzalandırılacağınızı da deyib...
- Fariz Yusifov haqlı və ya haqsız o qədər cəzalara məruz qalıb ki... Odur ki, bu söz mənim üçün yeni deyil. Haqlı-haqsız o qədər cəzalandırıblar ki məni. Əsas odur, vicdanım təmizdir.
- Tətbiq olunacaq cəza sizi qorxutmur?
- Fariz Yusifov Allahdan başqa heç kimdən qorxmur. Mən haqlıyam, heç nədən qorxmuram.
- Bu mövsüm hakimlik karyeranızda sonuncu ola bilər, yoxsa hələ fəaliyyətinizi davam etdirmək niyyətindəsiniz?
- Mənim hələ elə yaşımdır ki, karyeramı bitirmək barəsində, ümumiyyətlə, fikirləşmirəm.
