"Son iki oyundakı qələbənin davamını gətirmək istəyirik. Bütün futbolçular qarşıdakı matçın mahiyyətini yaxşı başa düşür. Oyuna necə lazımdısa, elə də hazırlaşmışıq. Meydana bizə sərf edən nəticəni qazanmaq üçün çıxacağıq”. Sportnet.az-ın məlumatına görə, bunu "Kəpəz”in futbolçusu Junior Martins (Juninyo) klubun mətbuat xidmətinə açıqlamasında deyib.
Təcrübəli yarımmüdafiəçi qarşıdakı görüşdə sabiq klubuna qarşı oynayacaq. Juninyo vaxtilə ölkəmizdə "Bakı” ilə yanaşı, "Xəzər Lənkəran”da da çıxış edib: "Keçmiş komandama qarşı oynamağım mənim üçün əlavə motivasiya olacaq. Amma heç bir prinsipiallıqdan söhbət belə gedə bilməz. Hazırda "Kəpəz”də çıxış etdiyim üçün bu komandanın uğurunu düşünməliyəm. Bütün fikrimi Gəncə klubunun oyunlarına yönəltmişəm”.
Qeyd edək ki, bu gün Gəncə şəhər stadionunda keçiriləcək "Kəpəz" - "Xəzər Lənkəran" matçı saat 15:00-da başlanacaq.
