"Neftçi"nin "Qarabağ"ı 1:0 hesabı ilə yendiyi Azərbaycan Premyer Liqasının XIV tur matçında insident baş verib. Sportnet.az-ın məlumatına görə, uzatma dəqiqələrində baş məşqçi Əsgər Abdullayev Elşən Abdullayevi oyundan çıxararkən, etirazla üzləşib.
21 yaşlı yarımmüdafiəçi oyunun gedişində meydana daxil olmasına baxmayaraq, sonadək çıxış etməməsindən narazılığını bildirib. Nəticədə o, Məhəmməd Qurbanovla əvəzlənərkən, birbaşa paltardəyişmə otağına yollanıb.
Oyundan sonra Əsgər Abdullayev həmsoyadının bu addımını belə şərh edib: "Elşən çox güvəndiyim futbolçudur. Onu əvəzləməyimin 2 səbəbi var. Birincisi, Abdullayevin qasıq nahiyəsində ağrılar olduğundan, daha da şiddətlənməsindən qorumaq lazım idi. Digər tərəfdən, biz vaxt udmalı idik. İrəlidə olduğumuz vaxt müdafiədə daha ucaboy oyunçuya ehtiyac olduğundan, Elşəni oyundan aldım və Məhəmmədi meydana buraxdım. Yəni, taktiki dəyişiklik etdik. Abdullayev mənim ən çox istədiyim oyunçulardandır, başqa heç bir problem ola bilməz".
