"Qəbələ"nin vitse-prezidenti Fariz Nəcəfov Rusiya "Krasnodar"ına 0:3 hesabı ilə uduzduqları Avropa Liqasının qrup mərhələsinin son tur matçından sonra jurnalistlərin suallarını cavablandırıb. Sportnet.az həmin müsahibəni təqdim edir...
- Oyun barədə nə deyə bilərdiniz?
- Məncə, daha yaxşı oynaya bilərdik. Gözlənilməz səhvlərdən qollar buraxdıq. Oyun maraqlı keçdi. Futbolçulara əzmkarlığa, sonadək mübarizə apardıqlarına, təkcə bizə yox, bütün ölkəmizə Avroliqa həyəcanı yaşatdıqları üçün təşəkkür edirəm. Bu səviyyədə oyunu, ümumiyyətlə, qrupa düşməəyi komandadan gözləmirdik. Mən "Qəbələ" ilə fəxr edirəm. Baxmayaraq ki, qrupdan çıxa bilmədik, sonuncu olduq.
- Sanki "Qəbələ" meydana çıxarkən məğlubiyyətlə barışmış komanda təsiri bağışlayırdı...
- Uşaqlar əllərindən gələni etdilər. Bacardığımız budur. Bundan artığını bacarmırıq. Deməzdim ki, komandamız meydana girəndə məğlub olmuşdu. Qapımıza top daxil olanadək çox yaxşı oynadıq.
- Oyundan sonra klub prezidenti komandanın paltardəyişmə otağında futbolçulara nə dedi?
- Tale Heydərov komandaya qrup mərhələsinə düşdüyü üçün və Avropa Liqasındakı oyunlara görə təşəkkürünü bildirdi. O, bütün diqqətləri daxili yarışlara yönəltməyimizi istədi. Dedi ki, qarşıdakı oyunu fikirləşin, yeni-yeni qələbələr qazanmağa köklənin.
- Qış fasiləsində bəzi futbolçunun göndəriləcəyi bildirilir. Bu, nə dərəcədə həqiqətə uyğundur?
- Bu barədə hələ məşqçi heyəti ilə söhbət etməmişik. Ola bilər.
- Növbəti mövsüm daha yaxşı çıxış etmək üçün nələri planlaşdırırsınız?
- Görüləsi işlər çoxdur. Bu turnir bizə böyük təcrübə oldu. Futbol baxımından, məşqçilər heyəti bütün məsələlərlə məşğuldur. Çatışan və çatışmayan şeylərə baxırlar. Rəhbərlik olaraq, növbəti mövsüm daha yaxşı çıxış etmək üçün əlimizdən gələni edəcəyik.
- Qəbələ şəhər stadionu nə vaxt beynəlxalq oyunlar keçirməyə hazır olacaq?
- Stadionla bağlı işlər görülür, layihə hazırlanır. Deyə bilmərəm ki, gələn il qrup mərhələsinə düşəcəyimiz halda, oyunlarımızı öz stadionumuzda keçirməyi çatdıra biləcəyik. Amma qrupa düşənədək rəqiblərimizi orada qəbul etmək üçün nə lazımdırsa, edəcəyik.
