"Qəbələ" klubu daha bir legioner futbolçu ilə yollarını ayıracaq. Sportnet.az-ın Ukraynanın "Sport Ekspress" qəzetinə istinadən məlumatına görə, məşqçilər korpusu Ukrayna milli komandasında çıxış etmiş Aleksey Antonovla yola davam etməmək qərarı verib.
Bu ilin yayında transfer olunan və 2 illik müqaviləyə qol çəkən 29 yaşlı hücumçunun göndəriləcəyi bildirilir. Lakin "Qəbələ"nin baş meneceri Zaur Əzizov Antonovun anlaşmasının davam etdiyini və gedişinin gündəmdə olmadığını bildirib.
Daha öncə Fakundo Pereyra, George Floresku, Vüqar Nadirov, Vaqif Cavadov və Derlis Meza Kolli də "qırmızı-qaralar"ı tərk edib.
Qeyd edək ki, ukraynalı legionerin son klubu Qazaxıstanın "Aktobe" komandası olub. Rusiyanın "Kuban" klubunda çıxış edən hücumçu vətənində "Metallist" (2007-2010), "Zarya" (2008-2009, icarə əsasında), "İliçevets" (2010-2011), "Dnepr" (2011-2013), "Krivbass" (2012-2013, icarə əsasında), "Çernomorets" (2013-2014) komandalarında oynayıb. Ukraynanın U-17, U-19 və U-21 yığmalarında çıxış etmiş Antonov əsas yığmada 2 matç keçirib.
