"Böyük məmnuniyyətlə müqavilə müddətini uzatdım. Anlaşmanın qalan müddətində komandanın inkişafı üçün yaxşı işlər görmək mümkündür və buna nail olacağımıza inanıram". Sportnet.az-ın məlumatına görə, bunu "Qəbələ"nin baş məşqçisi Roman Qriqorçuk deyib.
Ukraynalı mütəxəssis "Qəbələ" İK qəzetinə açıqlamasında klubu daha yüksək səviyyəyə çatdırmaq istədiyini bildirib: "Biz qarşımızda duran yüksək məqsədləri görürük. Onu da başa düşürük ki, buna çatmaq üçün çox güclü sistem yaratmalıyıq. Elə bir sistem ki, bunun sayəsində komanda uzun müddət yüksək nəticələr əldə edə bilsin. Əlbəttə, bunun üçün ilk növbədə, sabit komandamız olmalıdır. İşlər elə qurulmalıdır ki, nəticə davamlı olsun. Bütün bunları çətin də olsa həyata keçirməliyik. Qarşıya qoyulan əsas məqsədlərdən biri də "Qəbələ”yə tarixində ilk titulu qazandırmaqdır. Əlbəttə, mən bunu çox istəyirəm və istəyimi gerçəkləşdirmək üçün əlimdən gələni edəcəyəm”.
Qeyd edək ki, "Qəbələ" Roman Qriqorçukla müqavilə müddətini 2017-ci ilin iyununadək uzadıb. Qriqorçukun rəhbərliyi altında "qırmızı-qaralar" 2014/2015 mövsümündə Azərbaycan Premyer Liqasının bürünc medalını qazanıb və Avropa Liqasında qrup mərhələsinədək irəliləyib.
