Azərbaycan milli komandasının qapıçısı Kamran Ağayevlə hücumçu Vüqar Nadirovun Bakı "İnter"inə keçidi rəsmiləşib. Bu barədə Sportnet.az-a Ağayevin özü açıqlama verib.
O, Nadirovla birgə "İnter"in yarım illik müqavilə təklifini müsbət cavablandırdıqlarını bildirib. 30 yaşlı qolkiper bu gün Türkiyənin Antalya bölgəsinə təlim-məşq toplanışına yollandıqlarını da əlavə edib.
Qeyd edək ki, "İnter" Riu Kaya Belek mehmanxanasında məskunlaşacaq. Hazırlıq prosesi yanvarın 23-dək davam edəcək. "İnter" toplanış çərçivəsində 4 yoxlama matçı keçirməyi planlaşdırır.
