Yanvarın 17-dən Azərbaycanın futbol hakimləri təlim-məşq toplanışına başlayacaqlar. Bu barədə Sportnet.az-a FİFA referisi Əliyar Ağayev məlumat verib.
Onun sözlərinə görə, toplanış milli komandanın Mərdəkanda yerləşən təlim-məşq mərkəzində keçiriləcək: "Hələlik fərdi məşqlər edirik. Bununla yanaşı, həftədə 2-3 dəfə qrup məşqləri keçirilir. Oyun sayı az olacaq, amma əsas fiziki hazırlıq və mövsümün ilk yarısında olan oyunların analizlərinə üstünlük veriləcək. Əsas odur ki, praktikadan geri qalmayaq".
Ağayev bu gün start götürəcək "CBC Sport Kuboku"nda idarə olunacaq oyunlardan və qazanılan təcrübədən danışıb: "Yerli komandaların olmağı bəlkə də üstünlükdür. Çünki bu turnirdə həm yüksək liqa, həm də divizion klubları var. Təbii ki, yeni oyunçular olacaq və onların da oyunlarını tanıyacağıq. Əlimizdə olan materialla kifayətlənməliyik. Nəzərə almaq lazımdır ki, bu turnirdə çıxış edən elita komandaları yaxşı oyun göstərir, aşağı dəstə klubları isə yüksək yerlər uğrunda mübarizə aparır".
