"Neftçi"nin baş məşqçisi Böyükağa Hacıyevin Sportnet.az-a müsahibəsi
- Türkiyə və Avstriya toplanışları necə keçdi?
- Demək olar ki, yaxşı səviyyədə keçdi. lazım olanı ala bildik. Ən vacib olanı komandanı fiziki cəhətdən hazırlamaq idi. Bu iş əsasən, Boluda görüldü. Avstriyada isə texnika və taktikaya, yoxlama görüşlərinə fikir verdik. Bu oyunlarda udub-uduzmaq bizim üçün böyük önəm daşımırdı. Ən vacibi lazım olanları nəzərdən keçirmək və xəttlərarası əlaqələri yoxlamaq idi. Buna da nail ola bilmişik. Özünüz şahid oldunuz ki, hər şey qaydasındadır. Deyərdim ki, komanda qədərindən artıq qaçır.
- Yəni komanda fiziki cəhətdən tam hazırdı...
- Bəli, hələ oyuna qədər komanda daha yaxşı gözə çarpacaq. Biz rəqibi qiymətləndiririk. İlk təsnifat mərhələsində "Koper" "Çelik"i böyük hesabla məğlub edib. Bu da çox şeydən xəbər verir. Həm rəqibi qiymətləndiririk, həm də onlara ehtiyatla yanaşırıq. Çalışacağıq ki, Azərbaycan futbol ictimaiyyətinə "Neftçi"nin necə komanda olduğunu bir daha təqdim edək.
- Özünüz də qeyd etdiniz ki, "Koper" böyük hesabla qələbə qazanıb. Necə düşünürsünüz, iki oyuna 9 qol vuran rəqib komandanın hücum xətti güclüdür, yoxsa bu danışılmış oyunun nəticəsidir?
- Mən oyunlara baxıram. "Çelik"lə oyunda çox maraqlı qollar qeydə alındı. Bundan başqa "Neftçi" "Çelik" demək deyil.
- Bunun danışılmış oyun olduğu haqda informasiyalar var...
- Onu deyə bilərəm ki, orada olmamışıq. Biz bu söhbətləri eləmirik, bu cür məsələlərdən də uzağıq. Həmişə demişəm ki, güclü olan qalib gəlsin.
- "Koper"in hücum xətti daha güclüdür, yoxsa "Neftçi"nin?
- "Neftçi"dən yoxdur. Mən "Neftçi"dən güclü komanda tanımıram. Bu, həmin "Neftçi"dir ki, Milanda keçirilən "İnter"lə oyundan 2:2 hesablı bərabərliklə dönüb.
- Amma bu, həmin "Neftçi"dir ki, "Skenderbeu"ya da məğlub oldu...
- Ona görə də mən cəzamı çəkdim. Daha nə istəyirsiniz, güllələnmə cəzası almalı idim? (Gülür)
- Dünya çempionatını izləyirsiniz?
- Bəli..
- 5 qat dünya çempionu Braziliyanın məğlubiyyətini necə şərh edərdiniz?
- Braziliya 2 oyuna 10 qol buraxdı. Bu, hər şeydən xəbər verir.
- Azərbaycan Almaniyaya 1:6 hesabı ilə uduzmuşdu. Braziliya isə 1:7 hesablı məğlubiyyətlə üzləşdi. Deməli millimizin baş məşqçisi Berti Foqts Luiş Felipe Skolaridən daha yaxşı iş görür. Bu fikirlə razısınız?
- Bilirsiniz, siz onu bir əlli tutmayın. Foqts mənim qardaşımdır. O yaxşı baş məşqçidir. Foqts yaxşı məşqçi olmasaydı, Azərbaycanda 6-7 il davam gətirməzdi.
- İyulun 17-si "Koper"lə oyundur. "Neftçi" azarkeşlərinə sözünüz var?
- Azarkeşlərin hamısını stadiona dəvət edirəm. Onların dəstəyinə ehtiyacımız var. Onlar bizim 12-ci, 13-cü oyunçularımızdır. Ona görə də xahiş edirəm ki, stadiona gəlsinlər və sevimli komandalarına sahib çıxsınlar.
Rövşən ƏHLİMANOĞLU
