Türkiyədə təlim-məşq toplanışını davam etdirən AZAL klubu düşərgəyə 2 legioner dəvət edib. Sportnet.az-ın əldə etdiyi məlumata görə, baş məşqçi Tərlan Əhmədov brazliyalı Eduardo da Conceyçao Masiel və konqolu Freddi Mombonqonun xidmətində maraqlıdır.
Braziliyalı hücumçu artıq 2 gündür ki, komandanın düşərgəsindədir və "Balıkesirspor"a qarşı keçirilən yoxlama oyununda forma geyinib. Konqolu hücumçu isə dünən gecə "təyyarəçilər"ə qoşulub.
Eduardo karyerası ərzində Braziliyanın "Botafoqo", Almaniyanın "Rot Vayss Alen", Livanın "Əl-Əhli" klublarında forma geyinib. Mombonqo isə Belçikanın "Antverpen", "Mons", "Eypen" və Almaniyanın "Vuppertaler" klublarında oynayıb.
Qeyd edək ki, AZAL iyulun 25-də Türkiyənin "Antalyaspor" klubu ilə yoxlama görüşü keçirəcək. Bu qarşılaşmada hər iki legioner də meydana çıxacaq.
