"Qarabağ"dan tarixi qələbə - YENİLƏNDİ - MƏTN YAYIMI

Bu gün "Qarabağ" Avropa Liqasının qrup mərhələsində növbəti oyununa çıxacaq. Sportnet.az-ın məlumatına görə, Ağdam təmsilçisi Ukraynanın paytaxtı Kiyevdəki "Olimpiyski" stadionunda "Dnepr" klubunun qonağı olacaq.  

Bu görüş hər iki komanda üçün əhəmiyyətlidir. F qrupunda 6 xala malik İtaliya "İnter"i demək olar ki, ilk pilləni təmin edib. Fransa "Sent Etyen"i 2 xalla 2-ci pillədə qərarlaşıb. Hərəyə 1 xala malik "Dnepr"lə "Qarabağ" isə "Sent Etyen"lə birgə 2-ci pillə uğrunda mübarizə aparırlar. Məlum səbəblərdən oyun "Dnepr"in öz meydançasında baş tutmayacaq. 

"Dnepr" Ukrayna çempionatında lider olsa da, avrokuboklarda qol vurmaqda çətinlik çəkir. Çempionlar liqasında mübarizəyə III təsnifat mərhələsindən qoşulan ukraynalılar Danimarka "Kopenhagen"inə yenilərək (0:0, 0:2) Avropa Liqasına qoşulublar. "Pley-off" mərhələsində isə Xorvatiyanın "Hayduk"unu iki oyunun nəticəsində (2:1, 0:0) məğlub edən "Dnepr" qrup mərhələsinə adlayıb. Qrup oyunlarında da qol hesabını açmağı bacarmayan baş məşqçi Miron Markeviçin komandası avrokuboklarda cəmi 2 qola imza atıb. "Qarabağ" isə son 5 oyunda cəmi bir qol vura bilib. Hər iki klubdakı aşağı məhsuldarlıq oyunda minimal hesabın qeydə alınacağı fikrini yarada bilər.  

"Dnepr" matça yalnız Roman Zozulya itkisi ilə çıxacağı halda, "Qarabağ" Çumbinyo və Danilo Diasın xidmətlərindən məhrum olub. Bakıdakı məşqdə başından zədələnən Leroy Corc isə matça hazırdır.  

Qeyd edək ki, "Dnepr"lə "Qarabağ" arasında matç yerli vaxtla saat 22:05-də (Bakı vaxtı ilə 24 oktyabr saat 00:05-də) start götürəcək.

00:05. "Dnepr" (Ukrayna) - "Qarabağ" (AZƏRBAYCAN) - 0:1
Qol: Muarem Muarem, 21

Baş məşqçi: Qurban Qurbanov

Hakimlər: Libor Kovarjik, Kristof Menkl,Yan Patak.

Dördüncü hakim: Petr Blajey.
Əlavə köməkçi hakimlər:
Radek Prjixoda və Jan Jilek (hamısı Çexiyadan). 

Kiyev. "Olimpiyski" stadionu. 

Salam. Sportnet.az Ukraynanın paytaxtı Kiyevdəki "Olimpiyski" stadionunda keçirilən "Dnepr" - "Qarabağ" matçından mətn yayımına başlayır. Avroliqanın himni səsləndirildikdən sonra komandalar "Rasizmə yox" banneri ilə poz verirlər.

Oyun başladı. 

9` Fedetski Muaremə qarşı kobudluğa görə cəzalandı. 

9` "Qarabağ" hesabı açmağa yaxın oldu. Reynaldo rəqib müdafiəçidən sıyrılaraq, yaxın məsafədən qapıya zərbə endirdi. Boyko topu qaytardı. 

13` "Qarabağ"ın qapısı qarşısında təhlükə. Hüseynovun uzaqlaşdırdığı topun meydanı tərk etməsinə Şehiç imkan vermədi. 

17` Nadirova qarşı kobudluğa görə cərimə zərbəsi təyin edildi. Cərimə zərbəsini Almeyda çox pis yerinə yetirdi. 

19` Kravçenko Reynaldoya qarşı kobudluğa görə cəzalandı. 

21` Muarem rəqibin cərimə meydanına daxil olaraq, qarşısındakı müdafiəçiləri aldatdıqdan sonra topu uzaq küncə göndərdi. 

25` Nadirova sarı vərəqə göstərildi

29` "Qarabağ"ın qapısı qarşısına "asma"dan sonra topu yumruqla sovuşdurmaq istəyən Şehiç kobudluq nəticəsində yerdə qalır. Xoşbəxtlikdən, həkim müdaxiləsindən sonra oyuna davam edə bilir. 

36` "Dnepr"dən təhlükə. Qamanın uzaqdan zərbəsini Şehiç çətinlik çəkmədən tutdu. 

43` "Dnepr"in qol imkanını Rotan boşa verdi. Medvedevin topu itirməsindən sonra "Dnepr"in futbolçusu qapıya zərbə endirsə də, Şahiç topu qaytara bildi.

45` Şehiç Konoplyankanın uzaqdan zərbəsini ikinci cəhddə tuta bildi. 
45` İlk yarıya 1 dəqiqə əlavə olundu. 
 İlk yarı başa çatdı.  

İkinci hissə başladı. 
46`"Dnepr"in heyətində Yevgeni Şaxovu Yevgeni Seleznyov əvəzlədi. 
47` Reynaldo daha bir qol imkanını qaçırdı. Onun iti bucaq altından zərbəsini Boyko qaytardı.
 
50` Qarayev Bruno Qamaya qarşı kobudluğa görə cəzalandı. 

52`Nadirov topla hərəkət edərkən, yerə yıxılır və qolundan zədələnir. Tibbi müdaxilədən sonra o, oyuna davam edə bilir. 

53` Aqoli və Rotana sarı vərəqə göstərildi. 

58` Qamanın cinah "asma"sından sonra Seleznyovun başla zərbəsini Şehiç tutdu. 

59`Konoplyanka Almeydaya qarşı kobudluğa görə cəzalandı. 

63` Konoplyankanın təhlükəli cinah "asma"sından sonra Ruslan Rotanın baş zərbəsi qapının üstündən keçdi.

66` Muarem növbəti qolu vura bilərdi. O, qapıçı ilə təkbətək çıxsa da, zərbəsi dəqiq alınmadı. 

72` "Qarabağ"da ilk əvəzləmə. Cavid Tağıyev Vüqar Nadirovla dəyişdirildi. 

77` Kaliniçin cinah keçidindən sonra qapı qarşısına ötürməsi təhlükəli alındı. 

78` Reynaldo topla rəqibin cərimə meydançasınadək irəliləsə də, 3 müdafiəçi əhatəsində topu itirdi. 

78` Riçard Almeyda zədələnərək, yerdə qalsa da, ciddi bir şey yoxdur. 

80` "Dnepr"in cərimə zərbəsindən sonra Şehiç hamıdan yüksəyə tullanaraq, topu tutdu. 

82`Almeydanın əvəzinə Admir Teli meydana girdi. 

83`Maksim Medvedev vaxtı uzatdığı üçün cəzalandı. 

85` Qamanın zərbəsi qapının yanından keçdi. 

90` Muarem meydanı tərk edir və Namiq Ələskərov oyuna daxil olur. 

Matça 4 dəqiqə əlavə olundu. 

90+2` "Qarabağ"ın qapısına cərimə zərbəsi təyin olundu. "Dnepr" bu fürsətdən də yararlana bilmədi.

90+3` Şehiç daha bir təhlükəli hücumun qarşısını aldı. 

Oyun başa çatdı. 

Bununla da "Qarabağ" tarixi uğura imza atır. Azərbaycan çempionu təkcə Avrokubokların qrup mərhələsində özünün deyil, həm də Azərbaycan təmsilçiləri arasında ilk qələbəni qazanır. 2 il öncə "Neftçi" də Avroliqanın qrup mərhələsində oynamış, amma 2 heç-heçə ilə kifayətlənmişdi. "Qarabağ" isə "Dnepr" üzərində 1:0 hesablı səfər qələbəsi sayəsində xallarını 4-ə çatdırır və paralel keçən matçda "Sent Etyen"in "İnter"lə heç-heçə etməsi səbəbindən 2-ci pilləyə yüksəlir. "İnter" turu 7 xalla 1-ci, "Sent Etyen" 3 xalla 3-cü, "Dnepr" isə 1 xalla 4-cü pillədə başa vurur.