Dekabrın 5-dən 6-nə keçən gecə Bakı şəhər Dövlət Yol Polisi İdarəsi (DYPİ) rəhbərliyinin də iştirakı ilə genişmiqyaslı reyd keçirilib. Reyddə tanınmış idmançı, cüdo üzrə olimpiya çempionu Elnur Məmmədli də iştirak edib.
Bakı şəhər DYPİ-nin əməkdaşı olan və polis kapitanı rütbəsi daşıyan Məmmədli xidməti avtomobili ilə görüntülənib. 10 YP 307 dövlət nömrə nişanlı DYP avtomobilində xidmət aparan olimpiya çempionu gecə yarısı avtomobilin arxa yan şüşələrinə pərdə vuran sürücünü saxlayıb. Zərifə Əliyeva küçəsində – "Hilton" otelinin qarşısında "Range Rover" markalı, 90 DS 909 dövlət nömrə nişanlı avtomobili saxlayan Məmmədlinin iştirakı ilə həmin sürücüyə inzibati protokol tərtib olunub. Avtomobildəki pərdələr isə yığışdırılıb.
Jurnalistlərin çəkiliş apardığını görən sürücü etiraz edib. Sonra isə fikrini belə əsaslandırıb: "Mən dost-tanışa demişəm ki, Bakıda deyiləm, sizsə məni çəkib efirə verirsiz. Belə olmaz axı" (avtosfer.az).
