Oktyabrın 3-də "ASAN xidmət” mərkəzlərinin əməkdaşları arasında Şüvəlan qəsəbəsi ARENA idman klubunda Peyntbol Turniri keçiriləcəkdir. Sportnet.az-ın məlumatına görə, turnirin əsasnaməsi Gənclər və İdman Nazirliyi ilə Azərbaycan Respublikası Peyntbol Federasiyası tərəfindən təsdiq edilib.
Yarış 16 komanda və onların hər birinin tərkibində 6 idmançı olmaqla təşkil ediləcək. Məqsəd gənclərin fiziki hazırlığının artırılmasına dəstək, onların idman nailiyyətlərinin, o cümlədən, vətənpərvərliyinin, peyntbolun gənclər arasında təbliği, yeniyetmə və gənclərin vətənpərvərlik ruhunda mənəvi və fiziki tərbiyəsi, həmçinin, gənclərin sağlamlığının qorunması işinə xidmət göstərilməsidir. Turnirdə 1, 2 və 3 –cü yerləri qazanacaq komandalara və digər iştirakçılara müvafiq olaraq qiymətli hədiyyələr, diplomlar, xatirə medalları təqdim olunacaq.
İdmançıların mükafatlandırlması mərasimində Gənclər və İdman Nazirliyinin, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin, Azərbaycan Peyntbol Federasiyasının rəhbərliyi iştirak edəcəkdir.
