Azərbaycanın və “Qəbələ” İdman Klubunun kikboksçusu Alim Nəbiyev növbəti döyüşünü keçirəcək.
Sportnet.az klubun rəsmi saytına istinadən xəbər verir ki, 25 yaşlı idmançı nüfuzlu “Glory” seriyasında qüvvəsini sınayacaq. Yarımorta çəki dərəcəsində seriyanın reytinq birincisi olan Nəbiyev Fransanın Strasburq şəhərində təşkil edilən “Glory64” çərçivəsində rinqə çıxacaq.
Martın 9-da keçiriləcək döyüşdə onun rəqibi Surinam əsilli Hollandiya kikboksçusu Murtel Qrönhart olacaq. Bu gün isə idmançıların çəki mərasimi baş tutacaq.
Nəbiyevin 33 yaşlı rəqibi peşəkar rinqdə keçirdiyi 91 qarşılaşmada 65 qələbə qazanıb, 23 məğlubiyyət alıb və 3 dəfə heç-heçə ilə kifayətlənib. “Glory” reytinqində 3-cü olan hollandiyalı bu seriya çərçivəsində keçirdiyi 18 döyüşdə 11 dəfə qələbə qazanıbsa, 7 dəfə məğlubiyyətlə üzləşib.
Qeyd edək ki, “Glory” seriyasında keçirdiyi 5 döyüşdə 4 qələbə və 1 məğlubiyyəti olan Alim Nəbiyev ümumilikdə 57 dəfə rinqə çıxıb. Onun hesabında 50 qələbə və 7 yenilgi var.
