Fransanın Nitsa şəhərində keçirilən Henri Deqlan "Qran-pri"sində bu gün yunan-Roma güləşçiləri mübarizə aparır.
Sportnet.az-ın məlumatına görə, Azərbaycan təmsilçilərindən 4-ü finala yüksəlib.
60 kq-da A qrupunda yer alan Murad Məmmədov ilk görüşdə ispaniyalı idmançını elə ilk hissədə tam üstünlüklə məyus edib. Portuqaliyalı rəqibini də cəmi 2 dəqiqəyə üstələyən Məmmədov qrup lideri kimi yarımfinala vəsiqə qazanıb.
B qrupundakı Murad Bazarov isə debütdə İspaniyanın bayrağı altında çıxış edən erməni güləşçiyə gücünü göstərib. Növbəti görüşdə o, türkiyəli güləşçiyə məğlub olaraq qrup ikincisi kimi yarımfinala adlayıb. Finalın bir addımlığında yığma üzvləri üz-üzə gəlib və Məmmədov sevinən tərəf olub. Bazarov ispaniyalı güləşçini devirərək bürünc medala sahib olubsa, türkiyəli həmkarına uduzan Məmmədov gümüş medalla kifayətlənib.
67 kq-da mübarizəyə 1/4 finaldan qoşulan Namaz Rüstəmov yerli güləşçiyə minimal fərqlə uduzub. Bu çəkidəki digər təmsilçi İslambek Dadov Fransanı təmsil edən türkiyəli güləşçini vaxtından əvvəl məğlub edərək adını yarımfinala yazdırıb. Ancaq finalın bir addımlığında o, Fransa güləşçisinə minimal fərqlə uduzub. Rüstəmov ilk təsəlliverici görüşdə Avstriya təmsilçisini xalçaya çıxmağa peşman edib. Növbəti qarşılaşmada isə o, ispaniyalı həmkarına heç bir şans tanımayıb. Bürünc medal uğrunda qarşılaşan milli üzvlərinin duelindən isə Dadov qalib ayrılıb.
77 kq-da Sənan Süleymanov ilk mərhələdə gürcüstanlı rəqibi üzərində inamlı qələbə qazanıb. Fransanı təmsil edən ermənistanlı güləşçiyə də gücünü göstərən Süleymanov yarımfinala yüksəlib. Türkiyə güləşçisi ilə görüşdə isə xalların keyfiyyətinə görə qarşı tərəf qalib elan olunub. Azərbaycanlı pəhləvan gürcüstanlı rəqibinə növbəti dəfə qalib gələrək bürünc medalla təsəlli tapıb.
Rafiq Hüseynov qrupdakı ilk qarşılaşmasında avstriyalı güləşçini çətinlik çəkmədən məğlub edib. Türkiyəli pəhləvandan da güclü olan təcrübəli idmançı B qrupunun qalibi kimi yarımfinala vəsiqə qazanıb. Türkiyənin daha bir təmsilçisini sıradan çıxaran 2 qat Avropa çempionu adını finala yazdırıb. Həlledici qarşılaşmada Türkiyənin daha bir nümayəndəsi ilə qarşılaşan Hüseynov sonuncu xal prinsipinə əsasən gümüş medalçı olub.
87 kq-da İslam Abbasov ilk görüşdə gürcüstanlı həmkarına qalib gəlib. Hollandiya güləşçisi də onun qarşısında duruş gətirə bilməyib. Yarımfinalda ABŞ güləşçisini məyus edən Abbasov finala yüksəlib. Türkiyə güləşçisi ilə baş tutan son qarşılaşmadan da üzüağ çıxan azərbaycanlı pəhləvan fəxri kürsünün ən yüksək pilləsinə qalxıb.
97 kq-da Murad Lokyayev A qrupunda keçirdiyi ilk görüşdə Fransa idmançısına vaxtından əvvəl qalib gəlib. Lokyayev Polşa güləşçisinə də eyni aqibəti yaşadıb. Avstriya idmançısının da öhdəsindən gələn Lokyayev yarımfinala qrup lideri kimi yüksəlib. Yığma üzvü Avstriya güləşçisini də məğlub edərək finala vəsiqə qazanıb. Həlledici görüşdə gürcüstanlı rəqibi ilə bacarmayan milli üzvü gümüş medalı boynundan asıb.
130 kq-da Sabah Şəriəti ilk görüşdə çilili güləşçiyə məğlub olub. Rio-2016 Yay Olimpiya Oyunlarının bürünc medalçısı növbəti qarşılaşmada gürcüstanlı rəqibini minimal fərqlə üstələyərək gümüş medala sahib çıxıb.
Beləliklə, Azərbaycanın yarışda iştirak edən 9 yunan-Roma güləşçisindən 8-i fəxri kürsüyə qalxıb. Milli komanda "Qran-pri"də 1 qızıl, 4 gümüş, 3 bürünc medal əldə edərək, bu nəticə ilə 160 xalla ikinci yeri tutub.
60 kq
A qrupu
1-ci görüş: Murad Məmmədov - Endi Xuan (İspaniya) 9:0
2-ci görüş: Murad Məmmədov - Antonio Kabral (Portuqaliya) 9:0
B qrupu
1-ci görüş: Murad Bazarov - Albert Baqumyan (İspaniya) 3:1
2-ci görüş: Murad Bazarov - Kərəm Kamal (Türkiyə) 0:8
1/2 final: Murad Məmmədov - Murad Bazarov 3:1
Bürünc medal görüşü: Murad Bazarov - Endi Xuan (İspaniya) 9:0
Final: Murad Məmmədov - Kərəm Kamal (Türkiyə) 0:4
67 kq
1/4 final: Rüstəm Namazov - Stefan Klement (Fransa) 6:7
1/4 final: İslambek Dadov - Yasin Özay (Fransa) 8:0
1/2 final: İslambek Dadov - Mamadassa Silla (Fransa) 2:3
Təsəlliverici görüş: Rüstəm Namazov - Aker Əl-Obaidi (Avstriya) 10:0
Təsəlliverici görüş: Rüstəm Namazov - Markus Sançes (İspaniya) 9:0
Bürünc medal görüşü: İslambek Dadov - Rüstəm Namazov 4:3
77 kq
1/8 final: Sənan Süleymanov - Beka Mamukaşvili (Gürcüstan) 9:2
1/4 final: Sənan Süleymanov - Evrik Nikoqosyan (Fransa) 5:0
1/2 final: Sənan Süleymanov - Fatih Cengiz (Türkiyə) 3:3*
Bürünc medal görüşü: Sənan Süleymanov - Beka Mamukaşvili (Gürcüstan) 6:0
82 kq
1-ci görüş: Rafiq Hüseynov - Mixael Vaqner (Avstriya) 7:0
2-ci görüş: Rafiq Hüseynov - Salih Aydın (Türkiyə) 3:1
1/2 final: Rafiq Hüseynov - Burhan Akbudak (Türkiyə) 7:2
Final: Rafiq Hüseynov - Əmrah Kuş (Türkiyə) 1:1*
87 kq
1/8 final: İslam Abbasov - Qurami Xetsuriani (Gürcüstan) 3:1
1/4 final: İslam Abbasov - Tirone Sterkenburq (Hollandiya) 5:0
1/2 final: İslam Abbasov - Con Stefanoviç (ABŞ) 6:0
Final: İslam Abbasov - Metehan Başar (Türkiyə) 8:4
97 kq
1-ci görüş: Murad Lokyayev - Loik Samen (Fransa) 9:1
2-ci görüş: Murad Lokyayev - Pyotr Xudçik (Polşa) 8:0
3-cü görüş: Murad Lokyayev - Markus Raqqiner (Avstriya) 4:2
1/2 final: Murad Lokyayev - Daniel Qastl (Avstriya) 5:0
Final: Murad Lokyayev - Giorgi Melia (Gürcüstan) 0:5
130 kq
1-ci görüş: Sabah Şəriəti - Yasmani Akosta (Çili) 1:2
2-ci görüş: Sabah Şəriəti - Sulxani Buidze (Gürcüstan) 3:2
