Müxtəlif idman növlərində bir çox beynəlxalq turnirin təşkilatçısı olan "Qəbələ" İdman Klubu bu gün növbəti idman tədbirinə ev sahibliyi edir. Sportnet.az-ın məlumatına görə, Ümumilli lider Heydər Əliyevin anadan olmasının 92 illiyinə həsr olunmuş cüdo turnirinin digər təşkilatçısı isə Qəbələ rayon İcra Hakimiyyətidir.
İki yaş qrupu (2002-2003 və 2004-2005 təvəllüdlü idmançılar) arasında keçirilən turnirdə Azərbaycandan 20, Rusiyadan isə 1 klub iştirak edir. Ümumilikdə isə 242 cüdoçu fəxri pillələr üçün mübarizə aparacaq.
Qeyd edək ki, olimpiya sistemi ilə keçiriləcək turnirə günün sonunda yekun vurulacaq. Qaliblər kubok, medal və xatirə hədiyyələri ilə mükafatlandırılacaq.
