Azərbaycan Kubokunda ikinci yarımfinal oyununda “Sabah” səfərdə “Neftçi”yə 2:1 hesabı ilə qalib gəlib.
Sportnet.az xəbər verir ki, "Neftçi Arena"da keçirilən görüşü FIFA referisi Əliyar Ağayev idarə edib.
Matçın 11-ci dəqiqəsində qonaqların futbolçusu Umarali Raxmonaliyevin künc zərbəsindən sonra Azər Salahlı öz qapısına qol vurub. Görüşün 21-ci dəqiqəsində Tellur Mütəllimovun Ağadadaş Salyanskiyə qarşı kobudluğundan sonra meydan sahibləri penalti qazanıb.
“Bayquşlar”ın qapısına 11 metrlik cərimə zərbəsini Yuri Matias yerinə yetirməyə yaxınlaşıb. Onun zərbəsini rəqib qapıçı Stas Pokatilov dəf etsə də, braziliyalı müdafiəçi qayıdan topu qapıya göndərə bilib.
52-ci dəqiqədə isə Pavol Şafranko Xəyal Əliyevin ötürməsindən sonra uzaqdan zərbə ilə "Neftçi"nin qapısına yol taparaq komandasının qələbəsini təmin edib.
90+3-cü dəqiqədə isə "Sabah"ın köməkçi-məşqçisi Aleksey Antonyuk hakimləri təhqir etdiyi üçün birbaşa qırmızı vərəqə ilə texniki zonadan qovulub.
Günün ilk qarşılaşmasında “Araz-Naxçıvan” “Liv Bona Dea Arena”da “Qarabağ”ı 1:0 hesabı ilə məğlub edib.
Qeyd edək ki, yarımfinal mərhələsinin cavab görüşləri aprelin 23-də keçiriləcək.
------------------------
Azərbaycan Kubokunda yarımfinal mərhələsinin ilk oyunu keçirilib.
Sportnet.az xəbər verir ki, "Liv Bona Dea Arena"da "Araz-Naxçıvan" və "Qarabağ" komandaları üz-üzə gəlib.
Görüş meydan sahiblərinin qələbəsi ilə yekunlaşıb - 1:0.
24-cü dəqiqədə Ağdam komandasının əlcəzairli legioneri Yassin Benzia topu uzaqlaşdırmaq istədiyi vaxt Naxçıvan təmsilçisinin futbolçusu İssuf Paronun ayağına zərbə endirib. Burkina-fasolu müdafiəçi zərbədən yerə yıxılıb və həkimlər ona ilkin yardım göstərib. Baş hakim Elçin Məsiyev VAR-ın müdaxiləsindən sonra epizodun təkrarına baxıb və penalti qərarı verib.
Penaltini dəqiq yerinə yetirən Felipe Santos hesabı açıb. Bu qol 28-ci dəqiqəyə təsadüf edib.
"Araz-Naxçıvan"ın ən məhsuldar oyunçusu 83-cü dəqiqədə zədələnərək, meydanı tərk edib. Onu Vadim Abdullayev əvəzləyib.
Beləliklə, "Araz-Naxçıvan" bu mövsüm ilk dəfə "Qarabağ"a qalib gəlib. İki komanda arasındakı Azərbaycan Premyer Liqasında keçirilmiş ilk 3 oyunun hamısında Ağdam təmsilçisi qələbə qazanmışdı - 4:1, 2:0, 3:1.
Daha bir yarımfinal görüşü bu gün "Neftçi" və "Sabah" komandaları arasında keçiriləcək. Oyun saat 19:30-da başlanacaq.
Cavab görüşləri isə aprelin 23-də olacaq.
------------
Azərbaycan Kubokunda 1/2 final mərhələsinin ilk oyunları bu gün keçiriləcək.
Sportnet.az xəbər verir ki, ölkə çempionatının aşkar lideri “Qarabağ” səfərdə “Araz-Naxçıvan”la qarşılaşcaq.
FIFA referisi Elçin Məsiyevin idarə edəcəyi oyunda Ağdamı təmsil edən komanda aşkar favoritdir. “Qarabağ” ilk görüşdə finala vəsiqəni böyük ölçüdə həll etməyə can atacaq.
Mərhələnin digər oyununda paytaxtın iki iddialı klubu qarşılaşacaq. Ölkə çempionatında uğursuz mövsüm keçirən "Neftçi" və “Sabah”ın bütün ümidlərini kuboka bağlayıb. FİFA referisi Əliyar Ağayevin idarə edəcəyi qarşılaşmada gərgin mübarizə gözlənilir.
Azərbaycan Kuboku
Yarımfinal, ilk oyunlar
2 aprel (çərşənbə)
17:00 “Araz-Naxçıvan” – “Qarabağ” - 1:0
Qol: Felipe Santos, 28 (penalti ilə)
Hakimlər: Elçin Məsiyev, Elşad Abdullayev, Pərvin Talıbov, Kamal Umudlu
VAR: Nicat İsmayıllı
AVAR: Eyyub İbrahimov
Hakim-inspektor: Anar Salmanov
AFFA nümayəndəsi: Erkin Hüseynov
“Liv Bona Dea Arena”
19:30 “Neftçi” – “Sabah” - 1:2
Qollar: Yuri Matias, 21 - Azər Salahlı, 11 (öz qapısına). Pavol Şafranko, 53
İstifadə olunmamış penalti: Yuri Matias, 21 ("Neftçi")
Rəsmi şəxsə göstərilən qırmızı vərəqə: Aleksey Antonyuk, 90+3 (“Sabah” - hakimləri təhqir etdiyi üçün)
Hakimlər: Əliyar Ağayev, Zeynal Zeynalov, Akif Əmirəli, Cavid Cəlilov
VAR: Rauf Allahverdiyev
AVAR: Kamran Bayramov
Hakim-inspektor: Ömər Paşayev
AFFA nümayəndəsi: Elçin Məmmədov
“Neftçi Arena”
