AFFA Hakimlər Komitəsinin sədri Frank De Bleker Azərbaycan Kubokunun yarımfinal mərhələsinin ilk oyunlarında baş vermiş mübahisəli epizodları şərh edib.
Milli asssosiasiyanın mətbuat xidmətindən Teleqraf-a verilən məlumata görə, belçikalı sabiq FIFA referisi “Araz-Naxçıvan” – “Qarabağ” (1:0) və “Neftçi” – “Sabah” (1:2) görüşlərində yaşananlarla bağlı fikirlərini bölüşüb.
“Araz-Naxçıvan” - “Qarabağ”
24-cü dəqiqə
“Araz-Naxçıvan”ın yerinə yetirdiyi künc zərbəsi zamanı top yaxın dirəyə tərəf ötürülür. Bu komandanın 17 nömrəli futbolçusu (İssuf Paro) sağ ayağı ilə topla oynayır. Onun arxasında olan “Qarabağ”ın 7 nömrəli oyunçusu (Yassin Benzia) topa toxunmadan “Araz-Naxçıvan”ın üzvünün sağ ayağına zərbə vurur. Baş hakim oyunu davam etdirir. VAR müdaxilə edərək, baş hakimi epizodu izləməyə dəvət edir. Təkrar görüntülərə baxdıqdan sonra hakim “Araz-Naxçıvan”ın lehinə penalti təyin edir. Hakimin penalti qərarı doğrudur.
“Neftçi” – “Sabah”
19-cu dəqiqə
“Sabah”ın 17 nömrəli futbolçusu (Tellur Mütəllimov) cərimə meydanında “Neftçi”nin 91 nömrəli oyunçusunun (Ağadadaş Salyanski) ayağına arxadan zərbə endirdi. Hakimin penalti qərarını dəstəkləyirik.
90+1-ci dəqiqə
“Sabah”ın hücumu zamanı top bu komandanın 20 nömrəli futbolçusuna (Coy Lens Mikels) çatır. O, cərimə meydanı daxilində qapı xəttinə doğru hərəkət edir və topa zərbə vurur. Hücumçu topu vurduqdan sonra “Neftçi”nin 44 nömrəli oyunçusu (Yuri Matias) gecikərək onun ayağına təmas edir. Hakim oyunu davam etdirir və “Sabah”ın xeyrinə künc zərbəsi təyin edir. Hücumçunun ayağına təmas aşkar şəkildə görünür. Buna görə də biz penalti və VAR müdaxiləsini gözləyirdik.
Qeyd edək ki, "Neftçi" - "Sabah" görüşünün baş hakimi FIFA referisi Əliyar Ağayev, VAR hakimi Rauf Allahverdiyev olub.
