"Çempionatın təcrübəli baş məşqçisinə və ən ağır komandasına qarşı oynadıq".
Sportnet.az xəbər verir ki, bu sözləri “Səbail”in baş məşqçisi Elvin Məmmədov Azərbaycan Premyer Liqasının XXIX turunda evdə “Turan Tovuz”la 0:0 hesablı heç-heçə etdikləri oyundan sonra mətbuat konfransında deyib.
38 yaşlı mütəxəssis 1 xala görə razılığını gizlətməyib: "Üzləşdiyimiz durumun fərqindəydik. Uşaqlar maksimumu etdilər, yaxşı mübarizə apardılar. Onları təbrik edirəm. Bu gün hər qazanılan xal bizim üçün nəticədir. Komandanı bu durumdan çıxarmaq üçün öz yolumuzdan əl çəkməyəcəyik".
Məmmədov matça 3 xal üçün çıxdıqlarını deyib: "Turan Tovuz"a qarşı oynamaq asan deyil. Onlar çox möhkəm komandadır. Standart vəziyyətlərdə ideal şeylər edirlər. Üç xal istəyirdik. Uduzmadıqsa, gözəldir".
Baş məşqçi futbolçu Süleyman Alluşun AFFA Apellyasiya Arbitraj Tribunalı tərəfindən bağışlanmamasını belə şərh edib: "İstəyərdik ki, bağışlanılsın. O, bizim futbolçumuzdur. Səhvinin fərqindədir".
