"Qəbələ"nin baş məşqçisi Kaxaber Tsxadadze evdə "Araz-Naxçıvan"a 2:1 hesabı ilə qalib gəldikləri Azərbaycan Premyer Liqasının XIII tur matçından sonra mətbuat konfransı keçirib. Gürcüstanlı mütəxəssis əvvəlcə oyunu dəyərləndirib:
- İlk növbədə, futbolçularıma təşəkkür edirəm. Çünki onlar xarakter göstərdilər. İki gün əvvəl klub prezidenti Fariz Nəcəfovla görüşümüz, çox yaxşı söhbətimiz oldu. Orada kifayət qədər geniş müzakirələr apardıq və söz verdik ki, bu oyunda maksimumumuzu verəcək, əlimizdən gələni edəcəyik. Həqiqətən də futbolçular mübarizə apardılar, ürəklə oynadılar. Bu, məsələnin sırf emosional tərəfidir.
Oyuna gəlincə, bir qədər gərgin, əsəbi başladı. Rəqib yetərincə güclü komandadır, hücum xəttidə çox yaxşı potensialı, ayrı-ayrılıqda yüksək səviyyəli futbolçuları var. Görüşün əvvəllərində bizdə bir qədər həyəcan var idi. Buna görə də top itkilərimiz çox olurdu. Lakin qol vurduqdan sonra bir qədər sakitləşdik, daha rahat oynamağa başladıq. Qol epizodlarımız da oldu, sadəcə, istifadə edə bilmədik. Yenə də standart vəziyyətdən top buraxdıq. Fasilədə komanda ilə danışdıq və ikinci hissədə rəqibin, demək olar ki, real şansları olmadı. Düzdür, müəyyən üstünlükləri var idi, amma biz müdafiədə çox diqqətli oynadıq. Onlar cinahlardan daha çox hücum edir, uzaqdan zərbələr vururdular. Demək olar ki, ciddi qol vəziyyəti yarada bilmədilər. Biz isə çoxlu qol vəziyyəti yaratsaq da, bunlardan yararlana bilmirik.
Buna görə də oyunun sonları bir qədər əsəbi, gərgin keçdi. Sonradan meydançaya daxil olan futbolçularımız da çox yaxşı təsir bağışladılar və biz zonaları bağladıq.
Bu oyundan sonra gördüm ki, potensialımız daha çoxdur. Məşqdəkilərin 60 faizini oyunda ortaya qoya bilsək, daha yaxşı olar. Uğursuzluq seriyasından sonra sevinirik. Bu gün qələbə qazandıq, bu, emosiyalardır. Amma eyni zamanda hələ bir oyundur. Əsas odur ki, qarşıdakı matçlarda bu oyundan daha düzgün nəticə çıxaraq və davamı gəlsin.
- Bu qələbənin komandanın sabiq baş məşqçisi Elmar Baxşıyevin hazırkı kollektivi üzərində gerçəkləşəcəyini gözləyirdiniz?
- Elmar Baxşıyevə çox böyük hörmətimiz var. Həqiqətən də həm yaxşı insan, həm də yaxşı baş məşqçidir. Amma iş elə gətirdi ki, bu gün qələbə qazandıq. Əslində isə əvvəlki görüşlərimizdən də qalib ayrılmağı çox istəyirdik. Baxşıyev burada işləyib və "Qəbələ" üçün çox böyük işlər görüb. Əlbəttə, ona böyük hörmətlə yanaşır və buradakı fəaliyyətinə görə təşəkkürümüzü bildiririk.
- Adətən, baş məşqçilər oyunçusu qırmızı vərəqə aldıqları vaxt özlərindən çıxırlar. Amma siz Murad Musayevin meydandan qovulmasına əsəbiləşmədiniz...
- Əsas odur ki, rəqibin təkbətək çıxmasının qarşısını aldı. Yeganə səhvi o idi ki, həmin anda gecikdi. Son matçlarda onu lider kimi görürük. Söhbət kapitanlıqdan getmir. Ümumiyyətlə, müdafiədə o və İsak çox ideal çıxış etdilər. Komanda olaraq da yaxşı çıxış etdik. Murad həmin epizodda o hərəkəti etməklə, bəlkə də 3 xalımızı qorudu. Əlbəttə, "Turan Tovuz"la çempionatdakı növbəti matçımızda yoxluğunu hiss edəcəyik. Amma burada 3 xalı xilas etdi.
- 20 yaşadək futbolçular arasında dünya çempionatında Nigeriya millisinin heyətində iştirak etmiş "Qəbələ"nin gənc üzvü Salihu Nasiru niyə Premyer Liqa qarşılaşmalarında çıxış etmir?
- Komandamızda gənc futbolçuların sayı kifayət qədər çoxdur. Ona görə də hazırda bizə daha təcrübəli oyunçular lazımdır. Özü əvəzedici heyətdə oynayır, amma əsas komandada çıxış etməsi üçün vaxt lazımdır. Ona görə də Premyer Liqaya hələ sifariş etməmişik.
