"Karvan-Yevlax"ın kapitanı Vadim Abdullayevin evdə "Neftçi"yə 0:3 hesabı ilə uduzduqları Azərbaycan Premyer Liqasının XXX tur matçından sonra Sportnet.az-a müsahibəsi
- Komandanız çempionatın sonuna 3 tur qalmış axırıncı pillədə qərarlaşıb. Premyer Liqada qalacağınıza ümidləriniz hələ tükənməyib?
- Əsas məqsədimiz sona qədər əlimizdən gələni etməkdir. Hazırda formal da olsa, şansımız varsa, ondan maksimum yararlanmağa çalışacağıq. Mövsümün sonudur, istəyirik ki, çempionatı yaxşı notlarla başa vuraq. İndi nəticədən daha çox meydanda maksimum mübarizə aparmaq barədə düşünürük.
- Mövsümün sonunda “Karvan-Yevlax” Premyer Liqanı tərk etsə, komandadan ayrılacaqsınız?
- Hazırda mövsüm başa çatmayıb və bu barədə danışmaq istəmirəm. Mövsümün sonunu gözləmək lazımdır. Futbolda hər şey mümkündür. Bu gün nə yaşayacağımızı bilirik, sabahın necə olacağını isə heç kim bilmir. Ona görə də indi yalnız qarşıdakı oyunlara fokuslanmışıq. Mövsümün sonunda hər şey bəlli olacaq.
- Azarkeşlərə nə demək istərdiniz?
- Bu mövsüm komandamızın ən böyük üstünlüklərindən biri məhz azarkeşlər olub. Nəticələr istədiyimiz kimi olmasa da, onlar hər oyunda tribunada komandaya dəstək veriblər. Çətin anlarda da bizi tək qoymayıblar. Ən çox sevincə layiq olan insanlar da məhz onlardır. Biz də çalışırıq ki, onları sevindirək. Təəssüf ki, nəticələr hər şeyi göstərir. Açığı, heç biz də bu cür olmasını istəməzdik.
- Komanda bir ara daha yaxşı nəticələr göstərməyə başlamışdı. Bunun səbəbi nədə idi?
- Düşünürəm ki, burada bir neçə amil var. Açıq danışsaq, komandada müəyyən keyfiyyət çatışmazlığı hiss olunurdu. Kapitan kimi mənim gördüyüm odur ki, son oyunlarda yerli futbolçuların daha çox oynaması komandaya müsbət təsir göstərib. Reallıq budur ki, çempionatın səviyyəsini əsasən legionerlər artırırlar. Biz isə mövcud imkanlarımız daxilində mübarizə aparırıq. Son vaxtlar yerli oyunçularımızın performansı xeyli yüksəlib, daha keyfiyyətli çıxış edirlər. Bu da komandanın son turlarda dirçəlməsinə səbəb olub. İndi isə əsas məsələ bu tempi davam etdirməkdir.
Haşım MƏMMƏDOV
