"Bütün fikrimiz üç xala yönəlib. Bunun üçün meydanda gücümüzü qoyacağıq. Yaxşı toplanış keçmişik, çempionatla əziyyət çəkib hazırlaşmışıq. İlk oyunda əməyimizin bəhrəsini görmək istəyirik. Nə bacarırıqsa, meydanda göstərməliyik". Sportnet.az-ın məlumatına görə, bunu "Kəpəz"in futbolçusu Kərim Diniyev klubun rəsmi saytına açıqlamasında deyib.
Azərbaycan Premyer Liqasının XIX turundas "Qəbələ" ilə qarşılaşacaq "sarı-göylər"in üzvü komandada motivasiyanın güclü olduğunu söyləyib: "Psixoloji cəhətdən heç bir problem olmamalıdır. Çünki baş məşqçimiz bizi oyuna yaxşı kökləyib. Qalan amillər özünü oyunda göstərəcək. Düşünmürəm ki, bizim üçün çətin olsun. Həqiqətən də motivasiyamız yüksəkdir. Uğurlu nəticə qazanmalıyıq, başqa şey haqda düşünmürük. Gəncədə evdə oynayırıq. Üç xalı heç kimə hədiyyə etmək fikrimiz yoxdur. Başa düşürük ki, rəqib Azərbaycanın ən güclü komandalarından biridir. Onlara qarşı layiqli mübarizə aparacağıq. İnanıram ki, üç xal bizim olacaq".
