İspaniyanın "Real Madrid" klubunun futbolçusu Kriştianu Ronaldunun səfər oyunlarında uzunmüddətli qolsuzluq seriyası 80 gün davam edib. Sportnet.az-ın məlumatına görə, portuqaliyalı hücumçu İtaliyada "Roma" ilə Çempionlar Liqasının ilk 1/8 final matçının 44-cü dəqiqəsində möhtəşəm qol vurub.
Bununla da Ronaldu 2015-ci il noyabrın 29-dan sonra ilk dəfə rəqib meydanında fərqlənməyi bacarıb. Sonuncu dəfə bu, "Eybar"la İspaniya çempionatı matçına təsadüf edib. "Roma"nın qapısına endirdiyi dəqiq zərbə məşhur futbolçu üçün Çempionlar Liqasında 44-cü səfər qolu olub.
Digər tərəfdən, Ronaldu Çempionlar Liqasında 56-cı matçına çıxıb və bu göstəricidə "Barselona"nın sabiq yarımmüdafiəçisi Xavinin rekordunu təkrarlayıb.
Qeyd edək ki, Kriştianu Ronaldu "Roma" ilə oyun öncəsi mətbuat konfransını məhz səfər matçlarında qol vura bilməməsinə dair sualdan sonra tərk edib. İtaliya paytaxtındakı qarşılaşma "Real Madrid"in qələbəsi ilə yekunlaşıb - 2:0.
