"Qarabağ" növbəti mövsüm öncəsi heyətinə "əl gəzdirməyə" tələsmir. Klubun direktoru Əmrah Çəlikəl Sportnet.az-a açıqlamasında indiyədək heç bir futbolçuları ilə müqavilə haqda söhbətlərinin olmadığını bildirib.
O, bütün diqqətlərini mövsümün son oyunlarına yönəltdiklərini bildirib: "Hamımız mövsümün başa çatmasını gözləyir və baş məşqçinin rəyini bilmək istəyirik. Bu məsələdə tək qərar verən Qurban Qurbanovdur. Biz də onun komanda ilə bağlı qərarını təqdir edirik. Çünki ona inanır, güvənirik. Samuel Armenteros, Qara Qarayev də daxil olmaqla, hər hansı futbolçunun getməsi, qalması və digər məsələlər müzakirə olunmayıb".
Çəlikəl yeni futbolçunun nəzərdən keçirilməsini indiyə aid olmayan məsələ kimi dəyərləndirib: "Məşqçilərimiz transfer edilə biləcək futbolçularla maraqlanırlar. Ancaq hansısa futbolçunun keçidinin reallaşdırılması istəyi rəhbərliklə toplantıda rəsmiləşir. Bunun üçün bizə vaxt lazımdır ki, bilək və hərəkətə keçək".
