""Qəbələ"nin mövsümlərarası fasilədə ilk transferi Nika Kvekveskiri olub. Klubun baş meneceri Zaur Əzizov Sportnet.az-a açıqlamasında "İnter"dən gedən 24 yaşlı gürcü yarımmüdafiəçinin keçidinin həll olunduğunu bildirib.
Onun sözlərinə görə, Gürcüstan millisinin da üzvü olan futbolçunun məsələsinin yalnız rəsmiləşdirilməsi qalıb: "Biz Nikanı ötən mövsüm "İnter"in heyətində izləmişdik. İstər klub nümayəndələrimiz, istərsə də məşqçilər heyətimiz onun transferi variantı üzərində dayandı və nəticədə Kvekveskirini komandamıza cəlb etdik. Onunla ilkin razılaşma, ilkin müqavilə var. Ciddi problem ortaya çıxmasa, Nika gələn mövsümdə "Qəbələ"də çıxış edəcək".
Baş menecer bildirib ki, yaxın günlərdə yeni legionerlərin keçidinin həlli gözlənilir: "Yəqin ki, 3-4 günə yeni əcnəbi futboçuları heyətimizə qatarıq. Əsas diqqəti hücumameylli futbolçulara yönətlmişik".
Xatırladaq ki, ukraynalı Aleksey Qayın gedişindən sonra "Qəbələ"də yarımmüdafiənin mərkəzində, oyun qurucusu mövqeyində boşluq yaranıb.
